澳至尊現象
2018年11月29日
中美峰會前，兩國都出口術，白宮首席經濟顧問庫德洛表示，中美已重啟各級溝通，為雙方就貿易問題達成協定鋪上開通之路，刺激港股高開高走。
恒指去到呢啲位話高唔高，話低唔低，處於平衡待變局面，大股上上落落。有愛買細股嘅中環茶友話，今年港交所(388) 大開方便之門，幾
乎個個星期都有新股上，呢個情況出年應該持續。喺咁嘅環境下，新股固然唔熟唔炒，就算股仔身價都要重新檢視，因為唔少股仔都跌穿過六億嘅殼價。
賺錢公司市值低過殼價
茶友用啱啱公佈業績嘅澳至尊(2013) 為例，集團2016年喺主板上市，當時可謂一波三折。由於國際配售部份認購「意外」不足而延遲上市，於是公司改喺本港公開發售，集資額大縮四成，最後招股價0.55元，至今上市兩年，但股價仍然潛水，昨日收報0.415元。
不過，睇番澳至尊業績其實唔差，公司上市後首個財年盈利增長三倍，昨日公佈截至今年9月底止的中期業績，盈利1224萬元，按年增12.5倍；每股盈利1.63仙，唔派中期息。如果下半年盈利維持，公司市值三億，咁公司市盈率約12、3倍，數字唔可以話好好，但亦唔係咁差。最值得留意嘅係，公司現時市值僅三億元，單以一間業務簡單嘅公司計，單係殼價都唔止呢個數。
至於點解出現呢個情況，有人笑言話係因為澳至尊主席蔡志輝當年喺國際認購額不足時，自言公司「無大戶大手持股，股本結構更健康透明」，又強調上市唔係為咗「啤殼」。既然主席話唔係啤殼，外界覺得佢唔志在賣殼，於是股價就冇反映賣盤價值。
茶友呢個講法其實有多少係講笑，因為好似澳至尊狀況嘅公司其實唔少。O依家唔少公司營運問題唔大，財政狀況簡單嘅股仔，市值遠遠低過六億元嘅殼價。出現呢個現象嘅原因，係由於O依家上市比以前容易，同時借殼難度又增加。喺呢個狀況下，殼價冇跌，但要賣得出就要多花功夫，於是喺成事前，股價就唔會反映。
好似港交所話齋，公司上市唔應該為咗啤殼，但唔賣殼又衍生出另一個問題，就係三、四線公司掛牌，就算業績冇問題，年年派息，但交投往往門堪羅雀，反映唔到公司價值。長遠係咁嘅話，又點吸引公司晒咁多錢上市，仲要每年畀幾百萬上市費同上市開支呢？
澳至尊現象睇嚟唔係個別例子，喺呢類公司股價唔反映各種價值下，茶友坦言投資呢類公司要採取新估值，標準要提高，落手要小心，但咁樣就變成惡性循環，令呢類公司更少人玩，對大市交投以至整個證券行業生態都不利。只不過，呢個咁宏觀嘅問題，又有邊個關心呢？
中港股市偷步炒習特會，A股顯著上揚，帶動恒指發力衝高，最多升373點，見26705點，創10月9日以來新高，收報26682點，漲350點；國指大升119點，收報10634點，成交金額增至849億元。
習特會前或計數食胡
大市向好不得不提騰訊(700) ，佢噚日發力，股價高見315元，創兩個月新高，收市揚3.6%，報314.8元，仲係升幅第二多藍籌股。騰訊連升三日，累漲23.6元或8.1%，市值逼近三萬億元。
手機股獲資金追捧，鴻騰(6088) 、比亞迪電子(285) 收彈6%；同宜家達戰略合作嘅小米集團(1810) 收漲5%，報14.5元；舜宇(2382) 收漲3.7%，報78.2元，係升幅最大藍籌股；另一隻藍籌手機孖寶瑞聲(2018) 收升2.64%，報56.4元；上日大瀉近8%嘅通達(698) 反彈2.4%，收報0.84元。大市彈升咁多，習特會又即將嚟到，唔排除短炒客會計數食胡。
陸羽仁
金融High Tea 舊文
來源 source: http://hdfin.stheadline.com
