笑到最後 - 高明 2019年1月21日

笑到最後 - 高明 2019年1月21日


笑到最後：Multi-tasking＝請傭工 - 高明


Multi-tasking嘅本地版，即係等於請家庭傭工，想請個人返嚟做專才嘅工作，同時執頭執尾，並且唔需要付出好多成本。

資料圖片 適中字型 較大字型

最近一份網上潮圖，一名洋名為Boss的琴行僱主，列出近20項入職要求，包括大專畢業、懂電腦會計等，持有皇家音樂學院8級以上文憑，順便要派傳單、搵客戶等等，月薪9千至萬二。呢個就係一般港式企業管理掛喺口邊嘅Multi-tasking，如果嗰份人工有人應徵的話。

Multi-tasking起源於電腦，後尾有人將呢個概念應用咗喺人類度，睇嚇可否請一個人返嚟做九百幾樣嘢。

Multi-tasking嘅本地版，即係等於請家庭傭工，想請個人返嚟做專才嘅工作，同時執頭執尾，並且唔需要付出好多成本。好似以上琴行例子，一個有8級樂器嘅人，如果全力教樂器，肯定對琴行利益最大。

全球最Multi-tasking嘅工作，就係家庭傭工，由勞力工作嘅清潔煮飯洗碗湊小朋友，到知識型嘅教英文補習甚至管家服務等，基本上你叫一聲，有咩任務佢都會做，質素則另計。可惜嘅係，家庭傭工會嘗試處理任何問題，偏偏收入唔會夠廚師、陪月、補習老師等專注做一件事嘅人咁多。同樣的邏輯亦套用在股市之上，公司開多瓣業務，市場就畀個折讓佢個股價。

可能會有人話：公司捽得勁，間公司慳成本效率高，唔係仲好咩？如果一間公司狂捽員工當家庭傭工咁用，就係全球嘅偉大企業，員工應由一群家庭傭工組成。而香港人請咁多家庭傭工，又咁鍾意捽人，亦應擁有好多間偉大企業。可惜實情並唔係咁。

因為即使要捽，都要捽得其所，教樂器叻，咪捽佢教多啲班，如此類推。一間偉大企業必然要分工精細，每個人只做最擅長嘅一少部份。當員工家庭傭工咁用，短期感覺良好，實質都係搵自己笨，亦解釋咗點解香港係最自由嘅市場，但竟然產生唔到一間偉大企業。

高明
http://fb.com/bigricetea
本欄逢周一刊出



笑到最後 - 高明 舊文

來源 source: http://hk.finance.appledaily.com