智取大市 - 晉佳 2019年1月25日
智取大市：跑贏領展高息股 - 晉佳
中銀航空租喺2015年底十大客戶中，冇一間係大陸航空公司，當時最大客係國泰，佔7.2%收入。 適中字型 較大字型
上期講到飛機租賃行業同中銀航空租賃（2588）。一般嚟講，飛機租賃合約長達12年，消耗一架飛機大部份嘅青春（剩餘約13年價值一般只佔15%），飛機租賃企業買飛機時，已同客戶簽定租金等條款，只要航空公司唔執笠，12年租金理論上袋袋平安。盈利可測性咁高，於是唔少飛機租賃公司以槓桿去做呢盤生意，其中，中銀航空租賃嘅槓桿大約2至3倍，可接受，不太高亦不過份保守。以飛機租賃行業長期年回報率6%左右計算，中銀航空一單生意嘅槓桿後，年回報可以有10%以上（扣除利息成本後）。
利息高低成為關鍵因素，中銀航空本身係新加坡公司，2006年俾中行（3988）收購，正正利用母公司嘅融資優勢。近期美國暫停加息呼聲高唱入雲，對中銀航空租賃有利。
中銀航空租賃其餘風險因素係航空公司執笠、經濟長期低迷打擊長遠航空業需求同埋關稅等等。中銀航空喺2015年底十大客戶冇一間係大陸航空公司，當時最大客係佔7.2%收入嘅國泰（293），就當佢近年海航生意增加，估計比例都唔算多。平均剩餘租期8.3年，鎖定得多收入，未來盈利可測性高，講緊呢隻股得10倍PE唔夠，難怪舊年連領展（823）都跑得贏了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
