收市閒情 - 千頌C 2019年3月20日
收市閒情：港鐵我話OK就OK - 千頌C
港鐵炒車，但股價喺出事後低開然後拗腰彈。港鐵信號不穩嗎？股價準備破頂信號穩就OK了。 適中字型 較大字型
港鐵（066）因為signal wrong炒車，你以為佢之後條路好難行？嘿嘿！你唔見佢撞出一個「黃金交叉」！大家都知，喺股價圖見到「黃金交叉」就知係利好訊號，港鐵，真係一隻好股！點好法？我話OK就OK啦！
首先，大家如果見到港鐵有個「鐵」字，就以為鐵路係佢主業，咁你就真係識條鐵了，地鐵真正主業係「地」！睇返上年全年業績，客運業務收入冇錯係最高，有195億元，佔總收入達36%，不過利潤貢獻就只有14%；至於貢獻最大利潤嘅業務，就當然係車站商務，佔比又係36%，但睇佢收入，只係64.6億元，佔整體收入12%。都仲未計埋香港物業發展同租賃，根本港鐵有超過八成盈利都係地產相關。
咁個個都搞地產，咁點解港鐵冇得輸呢？無他，佢贏在起跑線。當年港英政府起地鐵，又唔想注資，於是就同地鐵講，「U add oil la，總之鐵路沿線，啲地就交畀你去搞啦！」本來已有土地發展權，後來為咗整治九鐵，要兩鐵合併，九鐵資產同土地，就半賣半送咁畀埋地鐵管。成功靠父幹，有港府呢個大後台，成功養起咗呢個超級地產公司。只要佢起新線，就會有地。
目前港鐵每日乘客近500萬，公共交通市佔率已經由2014年嘅48.1%，升到現時49.3%，要到五成指日可待！𠵱家香港人口越來越多，每日150個單程證呀嘛，根本不愁客源。乘客多，就要起新線，獨家嘅！有新線，就可以起樓，老馮嘅！咁樣港鐵邊有得輸呀？再講，就算鐵路運作得差，有咩後果呢？上年全年只係罰咗2,000萬咋。鐵路，有運作就得啦，畀心機搞地產好過。
所以你見到啦，港鐵星期五破頂見48蚊，股價喺出事後低開後拗腰彈，周二繼續有得升。港鐵信號不穩嗎？但股價準備破頂信號穩就OK了。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
