MyGut者言 - 徐家健 2019年3月20日
MyGut者言：過度遏制逐利的後遺症 - 徐家健
去年年底國務院忽然一句「遏制過度逐利行為」，內地教育板塊慘遭洗倉。資料圖片 適中字型 較大字型
去年年底國務院忽然一句「遏制過度逐利行為」，禁止民辦幼兒園上市或被上市公司收購，市場難免憂慮之後中小學業務亦可能面臨收緊，內地教育板塊慘遭洗倉。短短數月，A股來回地獄又折返人間，內地線上教育服務供應商新東方在綫（1797）現正招股。反觀香港不為逐利的教育板塊，津貼小學老師一句「今次校長要迫走我」，老師卻選擇跳樓不跳槽，在學校這一跳後再折返不了人間。
寫得出《道德情操論》，阿當史密（Adam Smith）不可能沒有同理心。在他更為人熟悉的《原富論》，這位經濟學之父卻又一早提出了「補償性工資差異」（compensating wage differentials）：The wages of labour vary with the ease or hardship, the cleanliness or dirtiness, the honourableness or dishonourableness of the employment，這概念還在二百多年後影響了棟篤男神黃子華：佢畀份人工你，一半係畀你做嘢嘅，一半係畀你受氣嘅。在逐利的自由市場經已如此，當逐利行為被過度遏制，補償性工資差異透過遏制不了惡性競爭，成了送老師上不歸路的元兇！
女友Babe搭的士又受氣：「我支持的士加價，就係太cheap，的士大佬先要靠黑面篩走啲cheap客。」我同意：「呢個係價格管制嘅必然後果，經濟差、八折的通街都係嘅年代，的士大佬啲面口不知幾好。」Babe舉一反三：「咁你估教書份高薪，有冇一半係預嚟畀老師受氣嘅呢？」我回答：「市場上嘅教育板塊，你幾時聽見過啲補習天皇怕俾人迫走？老細要炒你就炒你，而天皇教得唔開心就東家唔教教西家。所以有意見話加津貼學校老師人工就可以解決問題，其實只會令老師受更多氣。」
徐家健
美國克林信大學經濟系副教授
http://fb.com/economics3.0/
本欄逢周三刊出
MyGut者言 - 徐家健 舊文
來源 source: http://hk.finance.appledaily.com
