收市閒情 - 千頌C 2019年3月27日
收市閒情：濰柴對分析員唔客氣 - 千頌C
呢份就係濰柴業績紀念品：尿袋、鋼筆及Sandisk手指。分析員如要入場聽業績，盛惠388元，買咗至入場。 資料圖片 適中字型 較大字型
正所謂「相金先惠，格外留神」，上市公司搞得業績會，分析師到場出席，就梗係理所當然。不過，我諗噚日成行，真係諗都冇諗過，竟然有一個業績會，你要行入佢門口，首先要放低幾舊。
話說噚日濰柴（2338）發全年業績，一早就Call齊記者同分析師，準時10點鐘開始。門口有公關大員接待，放咗一袋二袋紀念品，一切看似好正常，不過，神奇嘅事就喺呢一刻發生啦！只要分析師們埋位登記，佢就會聽到，「唔好意思，麻煩入場前，先買咗呢份紀念品先啦。」嚇？呢份紀念品，盛惠$388！生生發發，好意頭呀！如果分析師唔肯課金呢？Sorry，佢係冇得入去嘅，請回。
Well？即係咁，分析師係代表投資者去了解公司營業狀況，你竟然要人先畀入場費？係當自己擺緊酒要先畀人情嗎？擺酒都話有餐飯食，咁呢盒價值388元正嘅紀念品，到底係咩貨色？各位觀眾，388元濰柴禮物包有：尿袋一個，鋼筆一支、Sandisk手指一隻，同埋神秘禮物盒一個！
千萬唔好睇少支筆呀，支筆認真犀飛利，因為支鋼筆係美國品牌Sheaffer犀飛利出品；至於個尿袋仲勁，印有「濰柴上市十五周年紀念」字樣，十五周年呀，真係可一不可再，下年你想佢再印同一個尿袋嗎？絕對無可能！更加突顯呢個尿袋矜貴之處，388蚊？抵到爛啦。
是咁的，據講噚日有200分析師出席，屈指一算，一個業績會就有77,600蚊收入！呢啲咪識做生意！不過，又話說，濰柴對分析員一向都好唔客氣，董事長譚旭光上年8月，因為不忿大摩降濰柴目標價，喺業績電話會議度發老脾，鬧大摩分析員「你不是發佈賣出的報告了麼，你已經算好了呀，我覺著你看錯了，我要是老闆肯定炒了你。」鬧一個都唔夠，再鬧另一個，「你不也下調評級了，以後要多來問問我。」
到底濰柴係咪想利用呢份「濰柴上市十五周年紀念」禮品包趕客，想分析師打道回府呢？你睇嚇記者嘅待遇就知了，待遇係點？每位出席記者，都獲派價值388元禮品包一份，歡迎隨便入內。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
