智取大市 - 晉佳 2019年10月18日
【智取大市】鬆樓按有乜盤算 - 晉佳
金管局總裁余偉文，買樓戰績11戰10勝，堪稱金管局內「樓王」。 資料圖片 適中字型 較大字型
今次《施政報告》宣佈買800萬樓可以按九成呢個消息，猶如核彈咁爆出嚟，全城譁然。
800萬買樓借九成又好，首置過唔到壓測又好，最終用加保費去解決，即係話，未來樓市有乜冬瓜豆腐，新上車嘅800萬以下嘅樓，借盡九成嗰批，佢哋輸咗中間六成至九成樓價，就有政府攬上身。假如他朝樓市升得癲，政府亦可再次收緊按揭成數控制風險。今次受惠800萬樓按九成嘅高風險上車人士，相信只會佔香港業主嘅少數，政府面對風險有限，而上咗車嘅有政府包底三成樓價，又未至於踩緊鋼線。實際風險未必如大家諗到咁嚴重。
再講，現時樓價已高，但近期壞消息充斥之下，樓價只跌咗半成咁大把，事後諗返確係令人幾震驚，逆境之下咁硬淨，通常代表回復好景時，價格升勢會強勁。喺現時有政府鬆綁按揭消息，加上區選前後有機會減暴力，二手成交確有機會轉活，成為轉捩點。
睇返金管局總裁余偉文，買樓戰績11戰10勝，堪稱金管局內嘅「樓王」，或許，佢實在太識玩個game了。坦白講，喺呢個時勢，仲咁樂觀去首置買樓長留香港，藍絲為數不少，黃絲有能力者可能諗移民。到頭來，鬆樓按表面幫市民上車，同時係完全無助解決紛爭嘅手段。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
