操盤手札記 - 割柑人 2019年10月29日
【操盤手劄記】修復撕裂唔容易 - 割柑人
港股正炒修復主題，資金傾向價殘重磅股。 資料圖片 適中字型 較大字型
上周，政府用兩分鐘撤回修訂《逃犯條例》，係市民用4個半月、捱咗超過5,000發催淚彈換嚟；不過，抗爭未停，民意已由「反送中」轉到「反警暴」。本周，市場睇住幾台戲，包括中共四中全會，據講會就中美關係、中國經濟、香港局勢作出應對。
若果四中調整對港路線，由鷹轉鴿，香港有望回穩；不過，社會撕裂，尤其警民關係，仍然難望修復，或者要由Restorative Justice（修復式正義）入手，讓加害者了解佢對受害者嘅傷害。講到修復，港股亦見炒修復主題，資金傾向價殘重磅股。
四中另外兩個焦點，中美關係同中國經濟，據《華爾街日報》引述參與制訂政策嘅官員講，會上將會討論「十四五」規劃草案，經修正嘅核心工業政策，將會取代備受美國批評嘅「中國製造2025」計劃。睇嚟係對政府補貼、技術轉移嘅指控讓步。
嚟到10月尾，環球資產市場本月波幅出乎意料地低，有別於10月傳統股災月。港股月中以嚟，喺600點之間上落。本周戲碼，除咗四中，仲有美國議息、英國脫歐，同場加映企業業績、經濟數據、期指結算，要搵爆邊藉口唔難，問題係爆上定爆落。
周一，港股受中美首階段貿易協議接近敲定刺激高開，一度重上27000關，可惜滙控（005）季績走樣兼變相發盈警，27000關得而復失，埋單僅升0.8%，收26891。美國聯儲局議息在即，估計利好有限，100天線（現處27021）明顯見阻力。
價殘藍籌之中，長江基建（1038）近期低位回升。集團業務遍及全球，由於英國收入比重最大，受累英國脫歐鬧劇；不過，脫歐已成爛戲，市場驚魂已定。該股月中一舉突破雙底頸線同20天線，上周回試後抽，周一升1.2%，預測息率4.5厘，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
