金手指 - 孫柏文 2019年10月29日
【金手指】過馬路爽咗好多 - 孫柏文
既然街邊拆咗咁多行人路圍欄，都冇多咗人被撞，咁不如唔好裝番。 資料圖片 適中字型 較大字型
上周，孫柏文喺紅隧揸車被撞，幾日後去差館落口供。落完口供，見有個交通意外調查組嘅阿sir得閒，我就把握機會，記者上身咁問咗兩句。
我：「阿sir，我八卦問，呢幾個月來有冇多咗交通意外？」
阿sir：「唔覺。不過交通意外中，有醉駕嘅就多咗。」
我：「呢個應該係因入夜冇曬啲公共交通工具，就多咗人去玩時揸車。」
阿sir：「我諗係因為我哋呢排都冇擺捉醉駕嘅road block。」佢一講，我心諗：「係呀，因為呢期擺嘅road block唔係捉醉駕囉。」不過我真係唔敢開口講。挑！係呀，我認。我驚去新屋嶺，之後我高空墮下，條屍都唔流血咁死咗。
我：「阿sir，不過有樣嘢我好想知。呢幾個月有冇多咗行人被撞？因啲圍欄拆咗咁多。」阿sir：「咁又唔覺多咗喎。」
就喺嗰下，我晴天霹靂！估唔到街邊拆咗咁多行人路圍欄，居然冇多咗人被撞？天呀！嗰啲管唔掂自己細路嘅怪獸港媽，鞭策啲日日希望能掛「成功爭取」banner出街嘅乞票區議員，將香港行人路變成豬棚、牛欄，將香港人變成畜生般行路，原來係冇point！
我真心希望，唔好裝番啲行人路圍欄，過馬路嘅路徑，唔使再抄啲自動吸塵機械人咁，唔使L字再L字咁，爽呀！
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
