操盤手札記 - 割柑人 2019年12月31日
【操盤手劄記】港股黃色經濟贏輸家 - 割柑人
黃色經濟圈原意係畀支持運動嘅商戶不致因社會動盪而結業，同時杯葛為政治經濟利益而支持政府嘅商戶。資料圖片 適中字型 較大字型
難捱嘅2019年已盡頭，所謂「年年難過年年過，事事無成事事成」，大環境嚟睇，中美貿談、英國脫歐，捱到年尾都有所成；但小環境嚟睇，香港政經無成，政府濫權、警察濫暴持續，抗爭運動勢將延續。
除夕前夕，港股喺期指結算日再升0.3%，收28319點。恒指一度觸及上升通道頂28400點水平，展望後市，短線唔排除整固，皆因由上年1月歷史高位33484點，同今年4月高位30280點延伸嘅下降軌，剛好處於附近成阻力位，250天線27500點水平則成支持位。
6月至今反送中運動孕育出「黃色經濟圈」，繼施永青月初唱淡後，屈穎妍、梁美芬、陳健波、邱騰華、《環球時報》、《大公報》等亦口誅筆伐，總括而言就係鬧爆黃色經濟圈注定失敗。既然咁廢，咪由得佢囉，點解咁㷫？
黃色經濟圈原意係畀支持運動嘅商戶不致因社會動盪而結業，同時杯葛為政治經濟利益而支持政府嘅商戶。究竟個圈有幾大？以區選294萬人投票，黃藍六四比計，即有176萬人；再按政府統計數據，每人每月平均開支9,253元，假設半數用於飲食消費計，即每年977億元。
千億市場，唔係嘢少！咁點做先會贏？關鍵係競爭力，要令自己利潤高過對手。好似中美貿戰，特朗普令美國人少買中國貨，亦令中國人多買美國貨。咁點界定黃店？事實上市面出現唔少偽黃，而若只嚴限龍門冰室、陸陸雞煲呢類深黃，個圈嘅生態會大縮。
港股中有無黃色經濟圈贏家輸家？先講贏家，有大快活（052）、壹傳媒（282）、香港電視（1137）、毛記葵湧（1716）等；輸家，港鐵（066）、國泰（293）、TVB（511）走唔甩。但股市搵食要分黃藍紅嘅話，就無乜好炒。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
