魚樂無窮 - 唐牛 2019年12月31日
【魚樂無窮】美團轉軚啟示錄 - 唐牛
美團點評第二季出乎意料有錢賺，股價裂口爆上。資料圖片 適中字型 較大字型
還記得2019年在蘋果第一篇專欄為「我最喜愛的股票」，對象是美團點評（3690）。單睇標題，大家以為我好勁抽，咁早call buy，實情當時係叫大家長put，博呢隻新經濟股跌到反艇，回頭睇番，如果唔投降的話，真係多多條底褲都唔夠輸。
不過，當刻睇淡並非亂吹，更是理由充份，包括市值2,000億銀但冇錢賺，以及禁售股出籠咩位沽都贏，但後者在3月發生後，股價只曾短暫失守50元便跌唔落，未幾更拾級而上，我的淡倉學費亦順利繳交。雖然軚已轉，但正式成為股東卻是9月的事︰8月底公司出業績，第二季出乎意料有錢賺，股價裂口爆上，最終整固破旗一刻我便上車，股價大概80元。
50蚊造淡然後80蚊反手買，表面看似荒謬，卻是合情合理。一來禁售期過去股價應跌不跌，值得尊重，二來績差變績佳，縱然盈利不多，但以其新經濟股背景，足以帶來無限憧憬（第三季亦交出靚數），結果資金最新將股價捧至紅底股水平。
盲目亂估無異於賭錢，所以那怕係啱定錯，睇好睇淡一定有理據，睇錯最多止蝕離場，睇啱就可以長升長有，讓好消息繼續發酵。最後，希望新一年大家繼續乘風破浪、長炒長贏！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com
