武漢疫情擴大搞到就嚟鎖市咁款，詭異嘅係，今次跌市存在非常關鍵兼巧合嘅技術操作因素，因為周一晚美股休市，咁啱喺新
年前港股通最後一個交易日先嚟疫症爆大鑊，要反映負面消息之餘，噚日唔沽，北水就要坐貨去到新年後，即係1月31日先有得沽。問題係，疫症最大考驗係喺春運期間，人流比平日大增唔知幾多倍，相信有機會喺新年期間再擴散，新年後隨時更大鑊。
唔敢講沽壓係咪七七八八，但恒指9日RSI單日由60打落去39真係好堅，參考舊年第一季港股升市，喺3月8日亦出現過升市首次大成交大陰燭，之後即日見底，再進入反覆升市成為整個反彈浪嘅收尾。今次大跌市，亦係12月至今升市以嚟最大成交，技術形態、形勢特徵亦相似。大跌市收市後，美股復市，只要美股靠穩，投資者有機會回復信心。
武漢係中國三大火爐，5月開始夏天，疫症相比沙士更長時間作戰，消費確有可能受打擊，但係一日大跌市係咪足夠反映？講嘅純粹係市場信心，有咗沙士經驗，暫時大家都認為武漢新型肺炎會隨住天氣而成為過去，一句price in咗，後市就可以任意演繹，將肺炎唔當係影響股市嘅因素。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
