美股大跌，有博士級人馬就話，「邊關油價事，係因為美國實施香港關係法！」呢個邏輯，的確唔係我等凡夫俗子看
得透。如果硬要為「美國跌市」搵始作俑者，我以下呢個說法，相信比較講得通：
要不是中國隱瞞疫情，疫情就唔會擴散到全世界；如果疫情冇擴散，就唔會全球需求大跌，令原油供過於求；如果唔係原油需求大減，沙地就唔會要求減產，咁就唔會令佢同俄羅斯反枱；如果佢哋冇反枱，就唔會逼到沙地玩攬炒，推冧油價。結論就係，要不是中國隱瞞疫情，蝴蝶效應下，全球埋單。
蝴蝶效應延伸落去，若爆發石油價格戰，最終可以好大鑊。面對俄羅斯唔肯減產，沙地話：「你大我呀？我就同你玩大佢！我自己推冧個價，睇你捱得幾耐？我就唔驚呀，我原油成本每桶先係10蚊（美元，下同），全球最平！」俄羅斯就大返佢轉頭：「我就預咗同你玩大佢嘅！就算油價跌到25蚊，我都頂到6年呀！」
呢種鬥大嘅玩法，就似1986年嘅石油戰爭。70年代至80年代初，油價係咁升，各產油國為搶市場，係咁增產，結果至到1986年就爆出供過於求危機，油價由35蚊打到落10蚊，展開為時十幾年嘅熊市。油價下跌，大大刺激美國、日本製造業；阿拉伯產油國近乎破產；之後洐生嘅債務問題以至石油糾紛，導致伊拉克入侵科威特、衍生波斯灣戰爭；油價大跌，亦成為瓦解蘇聯嘅最後一根稻草。
過往油價大跌，消費國會受惠。不過，事實係「油～不是80年代～」，目前，最大石油進口國係中國，油價大跌三成，理論上會受惠；不過若然疫情沒完沒了，作為世界工廠嘅中國，又點可以置身事外？咁有邊個可以置身事外？有！就係香港嘅油公司啦！油價點跌都好，香港入油都唔會平好多呢。佢哋一定會有原因：「個油桶貴咗……入油支槍貴咗……口罩貴咗……因為香港關係法所以……總知就成本貴咗啦！」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com
