【智取大市】M形反彈好淡通殺 - 晉佳
美股由炒增長股開始轉移到舊經濟股，其中Citibank出現報復式反彈。 資料圖片
環球反彈市由疫情受惠股、增長股開始轉移到受累舊經濟股，Citibank、美銀報復式反彈而Amazon、Netflix開始回吐，或許周初連龍尾滙控（005）都跟住升。
由龍頭炒到龍尾，大家自然覺得反彈市去到尾聲。
反彈市較大機會屬於M字形走勢，機會總高過反彈浪完結後直至急跌。美股有本事由低位反彈三成，壞消息放曬喺枱面之上，又點會咁易有大家預期唔到嘅壞消息再出現，令市況短期內又急插返去低位？當近期大手增持股票嘅大戶傻的嗎？個股喺反彈浪高位保持大幅上落狀態，為時可能有兩三星期。
以過往恒指月線圖睇，每次大跌市令指數跌破保歷加下軸後，姑勿論係見底回升定係技術反彈，總會喺高位出現跨月上落市，所謂跨月上落市，有可能4月見到反彈市高位，調整過後，5月再試高位多一次，太心急開淡倉亦好易左一巴右一巴。
落後股報復反彈為時幾長、幾時開始有啲難估，有可能係嚟緊呢個星期，又有可能出現一輪調整之後，月尾至下月初先展開。不過，無論係龍頭Amazon定係龍尾股Citibank、滙控，短期高位應未出現。吼龍頭嘅話，回吐時仍可吸納博衝多轉，落後股嘅話，應該仲有機會候高脫手。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
