【笑到最後】走中間路線將被壓死 - 高明
疫症令全球大洗牌，未來一係走入歐美文明世界，一係走入中國的一國市場，香港走中間路線將會被攬炒。 資料圖片
今年全球必定進入買定離手階段，之前寫過全球洗牌，現時前景更加明朗，一係走入歐美文明世界，一係走入中國閂門自成一國市場。過去舊秩序，處身於安
全嘅歐美地方，然後不斷讚揚中國先進嘅情況將不會重演，就算特朗普落台，呢個趨勢都唔會變。至於武漢肺炎，有疫苗之前，其實都係逼各國政府揀，到底想經濟死，定係病死。
新加坡實例證明，感染數字一度幾低都冇用，稍為覺得疫情冇乜嘢，人口密集並且有流動，武漢肺炎就會大爆發。但係另一方面，如果繼續任由社交距離、封關鎖國，經濟必定會收縮，中國經濟成功「保六」，首季經濟增長負6.8%就係一例。再加上各國政府都出手派錢、派糧，除美帝外，其他國家都冇可能無限印錢支持福利，時間一長又會出現失業率上升、債務危機等等，復工係惟一防止政權倒台嘅方法。
至於復工會導致人民病死，倒返轉去返第一個抉擇，用政治專家將責任卸返曬去武漢肺炎元凶度。取消社交距離，換嚟外交距離，做中國生意就唔好做文明世界生意，反之亦然。
過去二十年中國成為世界工廠，資金流入令整個經濟有錢，只要有錢其他各行就有活力。今次疫情發現，世界工廠等於將雞蛋放同一個籃入面，一旦出現禁運，喺中國有一百條生產線都冇用，本國國民嘅需求都唔會滿足到；政治上，全球敵視中國嘅民意開始形成，企業大鑼大鼓話投資喺中國，將會有政治後果。對舊有世界秩序嚟講，係一種破壞。買中資股博牛一的話，風險會比買其他地方，多一重撤資風險。
至於向來走中間路線嘅香港，喺落閘前會歸哪一邊？本欄相信，香港代理人繼續走中間路線，將會攬炒香港人，一齊俾度閘壓死。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com
