【廣告經綸】救火最緊要快 - 文廸晞
財政司長陳茂波宣佈向市民派發現金1萬元，睇嚇今次要幾耐先派到手。資料圖片
上星期阿Sam的網上義唱音樂會自彈自唱，好多人都很陶醉；前幾日Lady Gaga又係網上音樂會，集合全世界數一數二的大歌星，連續唱足8個幾鐘，合共籌得約10億港元善款。
你
去咗7仔買飯券未？每張才15元，目標係賣出7萬張，為基層送暖，即係大概要100萬，似乎並不太過困難。其實，這段時間，有好多NGO同大企業都紛紛度橋，人人都想做啲嘢。問題係，有幾多可以真正落實兼做出來？
搞這些善事，都係想人受惠，而唔係增加麻煩。切記玩法要簡單，複雜就自然少人參與，假如真心想幫人，就一定要方便人。例如萬寧，為減少去醫院感染機會，便提供攞藥服務，50元為你代勞。新世界就生產口罩，用好似汽水機一樣的自動口罩提取機，免費派發1,000萬個港產口罩給基層及弱勢社群。再早啲時候，《自由鳥》送兩個月免費Sim卡畀有需要嘅學生，等佢哋有足夠網絡數據安心在家網上學習。全部都idea清晰、手續簡單、及時紓困，相信，參與及受惠的人數自然多。
政府話派錢，睇嚇今次要幾耐先派到手，雖則有人話7月，但觀乎2011年派6,000元，需時21個月完成，2018年派4,000元，需時19個月。唔講可能冇留意，派錢計劃行政費一啲都唔平，需要在財庫局、庫務署及入境處短期增聘約100名人員，連同建立相關電腦系統及其他配套設施、向協助機構支付服務費、進行宣傳推廣以及應急費用等，額外一共要使成10億。
如此一來，又貴又唔夠快，相信好快疫情就會過去，要等嗰啲錢幫手救火，真係等到頸都長，場火燒清光都未收到錢，真係唔該曬！
文迪晞
mailto:heyadmen@gmail.com
廣告經綸 - 文廸晞 舊文
來源 source: http://s.nextmedia.com
