【利字當頭】價值投資已死 攬炒漸近 - 利世民
今次
全球武漢肺炎大爆發，帶頭反彈嘅科技巨企，舊經濟實力企業股價有更大折讓。 資料圖片
《金融時報》The Big Read 評論專欄見到一篇反思「價值投資」嘅文章，作者話合乎傳統價值投資理論嘅公司，過去十年因為資金氾濫，股價大落後；今次全球武漢肺炎大爆發，更加係首當其衝，相對帶頭反彈嘅科技巨企，股價有更大折讓。
除咗資金氾濫，另一個令股市兩極化嘅因素，就係多咗唔少指數基金。入指數，好多時只係睇市值；市值，又唔一定等於盈利能力。當資金越係追捧一籃子當時得令、高市值但盈利能力弱嘅企業，結果令佢哋股價更高，市值更大。呢個循環，導致唔少舊經濟實力企業變得無人問津，股價長期折讓。
從另一個角度睇，有啲企業無錯係顛覆曬整個行業，甚至整個產業鏈，但實情佢哋嘅盈利能力一般。話說回頭，市場競爭激烈，又真係冇乜理由會有企業可以長期維持高盈利。記唔記得零八金融海嘯之前，銀行金融業幾好景？上世紀末科網嘅同期所謂嘅Financial Engineering，都不知幾吃香。結果原來都係一場讀得書多嘅蠢貨喺度自欺欺人；呢啲迷債設計師上曬岸，有人從政，有人重新出發扮科網人。老友講得好：「金融，其實咪又係演藝行業。」
諗返轉頭，可能最簡單、最歷久常新嘅儲蓄產品，就係磚頭。不過，今次疫症各國政府都瘋狂派錢，之後佢哋又要搵啲人開刀。我有個預感，世界各地嘅商業物業，都好可能會被徵重稅。由有人類歷史，地產稅係最容易徵收嘅稅；業主，點走？業權？冇政府承認，你有咩業權？咁，點解係商業物業？因為正常嘅民主社會嘅政府，理論上唔敢得罪大多數人；但鬥地主，亦唔係邊個地方獨有嘅文化。都係嗰句，花無百日紅；我只係諗唔通，好似香港咁依賴土地經濟去支撐政府開支嘅地方，擾亂呢個價值鏈，結果又會唔會 #真攬炒 呢？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
