金手指 - 孫柏文 2020年5月12日
【金手指】油價跌完的迷思 - 孫柏文
股神畢菲特喺巴郡第一季業績報告中，講明仲不斷減持其他公司股份，乜都唔買，大家恣應知咩事。 資料圖片
「石油？上個月見咗底啦！仲唔大手撈？你識啲咩呀，仲話係前石油分析員。」呢句話，孫柏文聽唔少。隔幾日，同一班人話：「好彩冇聽你講，你睇嚇石油彈咗幾多！」
冇錯，上周確實係聽到呢啲說話，喺四月初我都係常聽到呢啲說法。嗰陣，5月交收嘅WTIC油價，啱啱跌到落廿蚊，跌穿「平均成本價」，又撞正油組話減產喎，所以油價大彈。之後發生乜事，唔使我再提啦。
咁今次6月交收嗰啲油點呢？紐約買賣嘅期油，係喺美國內陸中部做交收，冇得出口。百分百賭美國內部供求。需求就撻咗落嚟，供應則開始有油田閂喉。唔知6月交收合約落實嗰日，會否又再出現啲冇存倉能力嘅人，要不問價（負數？）沽出。
買石油，不過又冇接實貨能力嘅人，會是誰呢？更重要嘅係，仲有幾多呢啲人呢？之前啲石油ETF持有人，都係呢啲人。不過當啲ETF全部唔敢再掂6月交收嘅油時，唔通6月呢期先最冇異動？
石油，其實只係其中一個例子。今次全球經濟需求L形咁跌，各行各業，產能一日唔大幅減低，一日都冇運行。而當央行一日都印銀紙，托住啲債仔，邊度會有人將公司清盤，令產能下降？所以當股市仆直後，股神畢菲特喺佢旗艦巴郡嘅第一季業績報告中，講到明仲不斷減持其他公司股份，乜都唔買，你已知咩事。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com
