【利字當頭】賭仔唔會認係最後儍仔 - 利世民
只要投資市場有資訊不對稱現像，沽空機構就一定有獲利機會。資料圖片
香港傳媒對瑞幸做假賬一事，報道唔算多。如果唔係爆出醜聞，我真係未聽過呢間自稱可以挑戰星巴克嘅國產嘢。
開舖造數谷上市，唔係大陸獨有嘅現象；香港，一樣有。當然，名，就冇謂玩踢
爆。話說，尋日同朋友去外國記者會Bert"s Bar食飯，咁啱坐正個位後面張海報，就係芝加哥藍調之父Muddy Waters，所以話題好快就講到：「點樣靠玩踢爆獲利？」
首先，玩踢爆獲利，係一個非常之咁逆向操作。一向以來，財經金融界都係玩唱好大合奏，真係「強力買入」都唔等於要瞓身買入。如果話「沽售」都真係好禮貌咁同你講：「隻嘢，垃圾嚟㗎喎。」就算係獨立財務顧問，出得來行，都一定有朋友親戚要照顧，好難話得罪太多人。以前我都經常話，資產市場本來就有種「睇好嘅偏見」。
淡友，除非可以開口中，否則真係冇乜市場。所以，睇化曬嘅人，就算睇淡都唔會出聲；最多都係安慰嚇啲「魚」：「等低位，再撈貨溝淡。」
不過，沽空機構就係見到香港呢個咁特殊嘅環境，知道亂棍都可以撲中一兩隻妖股。嗱，呢啲就創業家精神喇；知道市場有資訊不對稱，就一定有獲利機會。另一個玩法，就係建立信譽之後，如果有人想玩質低股價收集，一樣係商機。
話說回頭，瑞幸事件，除咗NASDAQ要將隻嘢除牌，亦有傳會加強監控；雖然冇講明係針對大陸，不過動機都好明顯。港交所（388）會唔會因此受惠呢？香港又會唔會多咗沽空機構呢？又咁講，水清無魚，十賭九騙，有時擺明係一個局，賭仔都會覺得自己唔係最後一個儍仔。如是者，the party goes on。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
