【利字當頭】通往奴役之路？ - 利世民
主權移交後，香港變成政治問題法律解決，好難保得住真正嘅資本主義制度。資料圖片
「一隻手掌拍唔響。」中聯辦又譴責黃色經濟圈又話泛民攬炒，呢啲咪搵交嚟嗌囉。
下一步，做生意係咪要宣誓效忠黨國？當然，呢啲轉變唔會一朝一夕就出現。首先，係要最大嘅企業歸邊
，然後就公然咁對工商專業威逼利誘，同時扶植聽話嘅自己人，最後咪邊緣化剩低嘅少數人。香港今非昔比，以上所講嘅事，都已經發生得八八九九。
「英國人嘅時候，何嘗唔係偏幫英國人？」無錯，當年英資都真係有唔少制度上嘅優勢，呢個亦係香港呢個「尋租經濟」嘅DNA。不過，two wrongs do not make one right；你話英國人咁做唔啱，你係咪更加唔應該咁做先？
再講，知唔知點解香港有獨立嘅司法制度？話說，當年西敏寺山高皇帝遠，倫敦政府對香港嘅管治，最有效、最和諧嘅方法，就係「香港事，香港了」。不過，又唔可以畀你班人太過「圍威喂」，和諧之餘又可以互相制衡，如此這般就形成咗法治嘅基礎。
法治係乜？一個連牛頭角順嫂都明白嘅解釋就係：「唔使怕同政府打官司；政府都有可能輸官司㗎！」當然，一般平民百姓就梗係唔會隨便同政府打官司啦，生不入官門嘛；但至少你會相信，法庭唔會偏幫政府。
實情係，從前同政府打官司，多數都係資本家；司法獨立，真係對做生意嘅人最終保障。主權移交之後，就變成政治問題法律解決，呢個趨勢大家都知唔好，奈何處理政治既議會，又慘遭閹割。如此這般，就算香港冇失去獨立關稅區待遇，都好難保得住一個真正嘅資本主義制度。#香港再出發？通往奴役之路呀？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
