收市閒情 - 千頌C 2020年5月6日
【收市閒情】藍色經濟圈示範案例 - 千頌C
新地上年奪得西九高鐵站上蓋商業地，上星期以成本價向平保沽出項目辦公大廈部份合共30%股權，完美示範「藍色經濟圈」的運作。 資料圖片
老董及689牽頭搞「香港再出發大聯盟」，齋聽個名都已經知藍到黑，再出發？出發去邊？日本定泰國？去旅行去到盡，好唔好？
無啦啦「再出發」，說穿了的就是「再出發」抗衡黃絲聲勢。事實上，當中聯辦高調批評「黃色經濟圈」，證明呢個經濟「懲罰」操作方向上是正確。咁算唔算成功？至少搞掂咗食年輕人條水嘅喜茶囉。
於是，就有啲好得閒嘅人獻計，美其名搞個大聯盟，其實似係挾人上橋搞更緊密嘅「藍色經濟圈」。當然，自願定被逼都好，四大地產商係座上客是無懸念。
「藍色經濟圈」就不嬲都有，說甚麼黃色經濟圈是政治綁架經濟的「政治攬炒」？黎智英聽到時，唔知會唔會講：「Are you kidding me?」至於未來「藍色經濟圈」點運作？新地（016）或者已作出一個好好嘅示範。
新地上年11月底，以超過422億元，奪得西九高鐵站上蓋商業地，可惜中標後發現，這個地王買貴了，較次標高足足100億元。你又點估到，喺全球武漢肺炎爆到七彩之時，上星期新地及郭氏家族公佈，以成本價向平保（2318）沽出項目辦公大廈部份合共30%股權，成交價夾埋就係113億元。喂喂，正正啱啱好多100億少少！
即係咁，中資香港買地往績一向一般。啟德有5幅地皮在賣出後再易手，其中4幅地原買家就係海航。想當日海航高價搶地爆買，拓高市價，結果公司爆財政危機，最後中資地再落入香港大孖沙手中。
參考今次西九高鐵站上蓋項目，先由發展商投地，然後中資揀啱地，想幾時摻一腳就摻一腳，可以「加強中港企業交流」，喺呢個所謂「香港再出發」大前提下，增加商業上依賴，令項目「染紅」，絕對政治正確。
最後，值得一提係，平保將會喺呢幅地上面建香港總部，而西九高鐵站玄學上係有名嘅「西九毒蛇陣」佈局一環……希望有玄學家可以解說嚇今次平保嘅風水擺陣。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
