【智取大市】最後晚餐的訊號 - 晉佳
美國科技股大調整，似乎係第一次走火警機會較大，距離疫情轉機越近，市況會越癲同越危險。 資料圖片
上一期提到，科技股走勢同武肺疫苗進度呈反向關係。科技股周一晚收市前兩小時大跌，聽到嘅消息係，特朗普團隊講到，呢個夏季尾將會有武肺疫苗開始生產，於是疫苗股
大升。美國嘅疫苗喺9月陸續殺到，其實唔算新聞。重申一次，距離疫情轉機越近，市況會越癲同越危險。
科技股大調整，似乎係第一次走火警機會較大，市場亦普遍咁樣預期。要留意嘅係，真係冇事再炒過嘅話，理應快速回復信心，調整唔會持久甚至一晚即逝。拖得耐，形勢就不利。
另外，大家亦可留意美股AAL股價，呢隻股上周五顯著反彈，星期一市況就迎來大調整。呢隻只得59億美金市值嘅航空股，沽空比率佔已發行股本四分之一，炒起上嚟轉手率非同少可，絕對係呢轉升浪最後晚餐之中嘅甜品，值得備忘之餘，亦值得作為警號，佢一好似6月大炒，科技股就要逃。
細股的話，築友智造（726）大股東胡葆森向主要股東朱嶽海以0.31元買入後者餘下股份，大股東將股權歸邊，呢個時候做嘢，舉動好明顯，股價因大調整市況而上升唔多，可小注一試。另外，龍尾生科股歌禮（1672）亦因跌市限制咗升幅，市況好返應該會炒得更勁。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
