收市閒情 - 千頌C 2020年7月15日
【收市閒情】波叔屋企之「絕世筍工」 - 千頌C
舖王鄧成波（左）及兒子鄧耀昇。 資料圖片
港姐、警察此類曾經擁有光環的職業，今時今日要招募，都係用同一個包裝——就係「絕世筍工」，證明呢一份工嘅價值，已窮得只剩下錢。不過如果你問我，世上只有一份工，配得上「絕世筍工」嘅稱呼——那份職業叫「兒子」。
大約早兩個月，上咗去財仔朋友公司吹水（唔係借錢，我冇財困），中間佢同事打咗個電話：「喂？兄弟，我有個客想撲水，你嗰邊有冇fund source？邊個？大戶嚟㗎，好出名。」然後呢位仁兄嘗試扮細聲，用曬氣咁講，但實際上係以全世界都聽到嘅高分貝聲量去講，「咪波叔個仔囉，係呀，佢間BVI要度水呀。」
重點係，朋友呢間財仔只係三、四線嘅細行，可想而知，當時情況有幾嚴峻。結果，《蘋果》上個月底成功訪問波叔，證實咗上述消息，仲講到明「銀行都借到爆，咁就貴啲（財仔）都要借！」。
波叔個仔近年雄心壯志，又要做「酒店大亨」，夾夾埋埋成14幢；年頭入主松齡護老集團（1989），用超過1倍溢價去買，呢度又使多7.73億；之後，仲積極活化舊工廈，大搞Co-working space……總之咩都有啲咁啦。
富二代有野心唔係問題，真係no offense嘅，你搞得好嘅，就係成為一個有為嘅富二代，拓展家族王國，光宗耀祖、揚名立萬；博輸咗、太大想頭兼唔好彩嘅，就只係變成敗家仔咋嘛。
「嘩！乜你咁講嘢！敗家仔『咋嘛』？」一個富二代，仲要係超級富二代，輸咗，咪最多輸個名，爛船都有三斤釘，又唔會餓死嘅，最多咪做番「二世祖」；更何況，仲有爸爸幫手執手尾，連「告急」都幫個仔做埋，所以你話港姐、警察係「絕世筍工」？喺「兒子」面前，全部都行開啦。
後記：「寧做二世祖，莫做敗家仔」呢種傳統智慧真係好有智慧，一個二世祖，一個月使1,000萬好未？一年先係1.2億；不過敗家仔瀨一瀨嘢，閒閒哋就幾百億，屈指一算，夠養300年。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
