操盤手劄記│市場錯殺港交所（割柑人）
操盤手劄記│市場錯殺港交所（割柑人）
本地市場最擔心嘅係，京交所會否搶走港交所生意，削弱香港金融地位。
上周五晚，夜期上演驚魂一幕，事件由兩個關鍵詞——「發改委」、「VIE」引發。話說《彭博》爆料，有中國初創公司向發改委申請向開曼群島等地註冊嘅V
IE注資被駁回，夜期隨即腳軟，直墮近百點，經過一輪冷靜，半個鐘後倒升。畢竟未知係個別公司問題，定係制0度改變問題，未宜反應過敏。夜期最終升36點，低水22點。港股ADR比例指數，則高水6點。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
受制於中國法規，中國企業為咗吸引外資兼喺海外上市，慣喺海外設立可變利益實體（Variable Interest Entity，VIE），再向發改委等監管機構申請注入資產。現時，唔少VIE架構嘅中概股，都喺香港、美國股市交易，例如阿里巴巴（9988）、騰訊（700）等。上月，美國證券交易委員會主席曾經警告，美國投資者未必了解中概股，並暫停審批中概股以VIE架構上市。
新三板升呢 企業估值不改
講到中國企業上市，不得不提上周四晚國家主席習近平喺服貿會上，親自拍板設立北京證券交易所，係事隔逾30年，中國喺上海、深圳以外，再設立證券交易所。根據中證監解畫，京交所將以現有全國中小企業股份轉讓系統（俗稱「新三板」）嘅精選層為基礎組建，係新三板嘅「升呢」版。市場估計，習此舉係發出訊號：即使美國融資機會減少，仍可以喺中國融資。
目前中國資本市場除咗上海主板、深圳主板，仲有上海科創板、深圳創業板，京交所橫空出世，會否造成交易所定位重疊呢？據官媒《證券日報》分析，京交所定位係服務創新型中小企業，滬深主板則服務大中型企業，科創板服務硬科技產業企業，創業板服務高新技術企業、戰略新興產業企業等，各有定位。不過，令人費解嘅係，企業喺新三板精選層掛牌滿一年，已可轉到科創板或創業板上市，新開一個交易所，對企業估值、融資金額並無實際助益。
首八月交投 僅及港股半日
本地市場最擔心嘅係，京交所會否搶走港交所（388）生意，削弱香港金融地位，上周五港交所股價就急跌2.2%。港交所近年積極招攬新經濟公司如科技公司、生物科技公司嚟上市，京交所係咪程咬金呢？如上所述，京交所係為創新型中小企業提供融資平台，港交所則著眼大型科技獨角獸（估值逾10億美元），定位明顯有別，照睇京交所唔會搶食港交所嘅IPO大茶飯。
事實上，現時新三板掛牌企業共7,299間，當中，精選層66間、創新層1,250間、基礎層5,983間，但今年首8個月總成交僅約950億人民幣，只得港股同期日均成交一半。據內地業界講，新三板企業一般融資額約2,000萬至5,000萬人民幣，遠較創業板企業平均融資額約1.5億人民幣為低。此可佐證，由新三板「升呢」嘅京交所，對港交所並不構成競爭。港交所日前急跌，料屬市場錯殺，反而造就低吸機會。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
