操盤手劄記│科技股跌到夠殘？（割柑人）
操盤手劄記│科技股跌到夠殘？（割柑人）
上周，股債滙幣同步出現避險突破。
加息開大定開細，個個星期有得賭！皆因個個星期有經濟數據、有官員言論──總之，市場情緒隨之波動，市場猶如賭場！上周，美國聯儲局官員重申加息決心，美滙指數繼7月14日高見109
.29回調後，上周五高見108.21，連升三日，連過106、107、108三關；美國10年期債息高見2.998厘，事隔1個月再逼近3厘；美股道指、標指、納指分別跌0.9%、1.3%、2%。本周焦點落喺儲局主席鮑威爾周五喺Jackson Hole全球央行年會嘅演說，預料有加息啟示。
美股、外匯、加密貨幣免費即時報價，自選投資組合獲取相關新聞提示。
美元作為環球資產嘅定價基準，所有熱錢嘅來源，一向係市場嘅「風險之母」；而美債孳息率係美元資產無風險利率水平嘅體現，即係環球資產嘅定價之錨。對股市嚟講，美國10年期債息上升，會削弱未來現金流「貼現」（將未來現金價值折算為當前現金價值）水平，從而壓低增長型股票嘅估值，例如科技股。因此，以科技股為主嘅納指，跌幅大過道指、標指。
風險情緒急速轉向
近期市場出現兩個異常現象：①科技股重新上位；②股債滙幣同步破位。先講前者，美銀8月全球基金經理調查顯示，雖然市場情緒仍然悲觀，但唔再係「世界末日」，皆因預期通脹見頂、加息放慢；而最擠擁交易中，三甲依次係睇好美元、睇好商品、睇好現金，意外嘅係睇好FAANG科技股排第四位，係兩年嚟重新睇好增長股跑贏價值股。呢四大交易，其實好矛盾，因美元、現金屬避險倉位，商品、科技股則屬逐險倉位。
再講後者，喺不同經濟環境下，各類資產表現不同，通常各自走勢反覆，罕見同步出現突破；但喺上周，股債滙幣同步出現避險突破。最先係加密貨幣向下突破，Bitcoin由周初24,000美元水平跌至周末21,000美元水平，跌幅達13%；緊接係美滙指數突破旗形，蓄勢破頂；美國10年期債息亦突破旗形；美股則跌破7月中至今嘅上升軌。多類資產同步破位，反映市場風險情緒急速轉向，小心！
騰訊績後加碼回購
喺美股，增長股嘅代表係FAANG；喺港股，則係ATMXJ。上周五，喺美國掛牌嘅中港股票普遍跟隨美股下跌，納斯達克金龍中國指數跌1.8%，港股ADR比例指數低水240點或1.2%；藍籌中槪科網股ATMXJ，美國股價分別較香港低1.8%、1.4%、1.7%、3%、1.1%。恒指6月尾起走下坡，8月以嚟喺橫行區間上落，受制於10天線反覆偏弱，預料將下試橫行區底部19500；ATMXJ則6月至7月起走下坡，開始橫行係好訊號，估值或已充分反映風險。
當中，騰訊（700）上周三收市後公布中期業績，係一味靠慳嘅業績，但隨著Blackout Period解禁，上周五收市後披露已即時重啟回購，一出手就3.5億元，比上兩輪（6月尾至7月中、3月尾至4月中）日均3億元重手。騰訊上輪回購，係6月尾南非大股東Naspers預告減持後展開，以撐股價。騰訊放榜前夕，市場突傳集團打算沽清美團（3690），管理層喺業績會澄清消息「不準確」，而非否認；咁唔係沽貨，係咪有其他後著？據管理層暗示，繼實物分派京東（9618）後，再派所持其他上市公司股份亦係回饋股東選項，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
