操盤手劄記│大戶食髓知味 賭英鎊1算（割柑人）
操盤手劄記│大戶食髓知味 賭英鎊1算（割柑人）
上周五英國公布50年嚟最大規模嘅450億英鎊減稅方案，用以刺激經濟，稅收減少則由發債彌補。
逆向貨幣戰！事緣香港時間上周四淩晨，美國聯儲局雖然一如預期加息0.75厘，但「鷹氣逼人」嘅係點
陣圖預示今年仲會再加1.25厘，明年再加0.25厘。同日，多國央行議息，英國、挪威、印尼、菲律賓加息0.5厘；南非、瑞士加息0.75厘，瑞士結束8年負利率政策，亦標誌著歐洲10年負利率時代結束；日本則維持利率不變，成為最後一個負利率國家。美國激進加息引致美滙急升，非美貨幣急跌，加息戰引發貨幣戰，多國動用儲備幹預滙價，連日本都終於出手！
美股、外匯、加密貨幣免費即時報價，自選投資組合獲取相關新聞提示。
上周四美滙指數高見111.81，而日圓繼3月失守「黑田防線」125兌1美元、4月失守130關、6月失守135關、9月失守140關、到9月7日觸及24年低位144.99後，上周四喺日本央行行長黑田東彥議息後發言時跌穿145，低見145.9。不足一小時後，日本財務省終於忍唔住出手幹預滙價，先喺下晝4:03至4:44出手，日圓由145.7347反彈至140.6995，再喺夜晚7:32至7:59出手，日圓由142.787反彈至141.26。黑田本來唔認為政府會幹預，但滙市係歸財務省管轄而非央行。
當年廣場協議難重演
日本24年嚟首次幹預滙價，又咁啱係9月22日，令市場勾起37年前9月22日，美、日、英、法、德簽訂《廣場協議》聯手幹預滙市嘅回憶。日本簽訂協議後，日圓大幅升值，90年代泡沫經濟爆破，陷入「迷失30年」。今趟會唔會有新嘅《廣場協議》？估計唔會，雖然美元強勢同當年相似，但各國協調唔少得有美國，而美元強勢係聯儲局緊縮貨幣政策嘅副產品，弱化美元與其政策有矛盾。今趟日本只能孤軍作戰，除非央行「卸鴿」，否則日圓弱勢難改。
講到政策矛盾，不得不提英國。上周五英國公布50年嚟最大規模嘅450億英鎊減稅方案，用以刺激經濟，稅收減少則由發債彌補。市場認為，新首相同財相正在豪賭，擔心大舉發債削弱外界對英國經濟信心，引發貨幣危機；而且，刺激措施同央行加息遏制通脹嘅緊縮貨幣政策有矛盾。市場用腳投票，英鎊兌美元急跌3.8%，低見1.084；英國10年期債息急升至3.827厘，比美國10年期債息3.688厘高。德銀外滙主管直言，市場發出強烈訊號，不願為英國額外財赤提供資金。
美元一將功成萬骨枯
上周五美滙指數連破112、113兩關，高見113.23，一將功成萬骨枯，歐元兌美元低見0.9668；英鎊兌美元失守1.1關、兌掛鈎美元嘅港元險守8.5算；日圓經幹預後，兌每美元守143關、每百日圓兌港元守5.47算。滙市之外，股、債、商品亦殺氣沖天，美股三大指數跌1.6%至1.8%；歐股Stoxx 600指數跌2.3%，比1月高位回落20%，墮入技術性熊市；美債孳息2年期突破4.2厘、10年期徘徊3.7厘；現貨金跌1.7%；期油跌5%。市場槍林彈雨，小心！
市場既如戰場又如賭場，睇返滙市，大戶似乎押注英國為吸引外圍投資者不惜容許英鎊貶值，資金繼8月推低歐元到兌美元跌穿1算、9月推低日圓到跌穿145兌1美元後，再賭英鎊兌美元1算。上周五彭博報道，根據期權定價模型，未來6個月，英鎊兌美元有26%機率觸及平價，比上日嘅14%急升。美元升、英鎊跌，港股之中，喺英國有業務同資產嘅會受滙兌因素影響，包括長和系、滙豐（005）、渣打（2888）等。當中，滙豐ADR上周五折算港股報44.21元，比本港低3.3%，不宜接飛刀。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
延伸閱讀：兌換英鎊點先最抵？比較銀行找換店最新兌換價
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
