大師冇點你│減息係咪利好股票？（李聲揚）
大師冇點你│減息係咪利好股票？（李聲揚）
Getty Images) · Michael M. Santiago via Getty Images
美股炒「減息周期」，其實有啲奇怪。晨早已經開始咗減息啦，仲「減息周期」？所以唔少人去睇「減息周期資產表現」，都有些少表錯情。因為已經減咗三次，股票亦升咗唔少。即使例如（例如咋下）以往減息周期有利股票都好，都唔等於你今日飛入去都仲得。
美股外幣即時報價 多國新聞任睇
減息係咪有利股票？
至於減息係咪有利股票？都幾難答。如果你睇歷史數字嘅，首先要諗下你點定義「減息周期」。有啲時間係又唔加，又唔減，咁點計？另外，唔好忘記，減息周期又好，加息周期又好，股市都係多數升的。問題係，股票在減息周期，係咪特別好？
減息有利股市，當然有理論支持。最簡單嘅係，企業借貸成本下跌，利息開支減少，會對盈利有幫助。另外，如果利息夠高，咁你做定期都5厘息，就比較少人買股票。相反，如果利息低，啲人就焗炒股票。低利息，亦都令多人借錢買股票。以上種種，似乎都係有利股市。
不過現實，就永遠唔係咁簡單。一路減息一路跌，大家都見得多。2008年見過，2020年都見過。因為有個講法，減得息就多數係經濟差，的確如此。只能講句：如果係冇金融危機下嘅減息，多數都會對股市幾好。但爆金融危機呢？就十分刺激了。
減息買債 係千錯萬錯
至於好多人以為，減息應該買債，就真係千錯萬錯。你買短債都仲好啲，但若你買長債嘅，邊個話你知會長息會跟短期利率一樣咁行？減息差不多一年，你睇隻TLT（美國長債ETF），差不多跌足一成。
所以，真係唔使諗咁多，減息加息周期，唔好太過執著，好可能都係照樣咁玩。加息係買股票，減息都係買股票。你諗下，過去咁多年，利息有升有跌 —但股票升咗幾多倍？
實務上，有啲股票，就真係直接得益於減息，咁可能可以睇高一線，雖然都有唔少偷步升咗。但在港股嚟講，都仲有好多股票唔係太貴。減息的話，照計點都幫到樓市，而唔少地產商都高槓桿，減息又幫到佢地，雙重受惠。眾多地產商固然有得諗，仲有之前利息開支好大，大到要供股嘅領展（0823.HK）。而如果樓市回暖，當然亦都幫到美聯（1200.HK）。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
