大師冇點你 - 李聲揚 2025年8月5日
大師冇點你│倉位就係一切（李聲揚）
大師冇點你│倉位就係一切（李聲揚）
同大家介紹一個投資上好重要嘅概念，叫做「倉位就係一切」。冇乜故弄玄虛，就係字面咁理解，但太多人低估咗呢樣嘢嘅重要。
美股外幣即時報價 多國新聞任睇
冇買就一般冇資格講嘢
並唔係冇錢冇資格講嘢，而係冇買就一般冇資格講嘢。你1萬蚊身家，All in買港交所（0388.HK），有資格講。你1000萬身家，冇買股票——點解要聽你意見？
用另一個角度演繹，就係「咁睇好，做乜唔瞓身家買？」或者「咁睇淡，點解唔瞓身家沽空？」唔呃你，呢個測試，可以幫你慳返好多時間，踢走好多廢話網友或者朋友。
有人話港股無運行，有人話「依然睇淡港股」。好啦，咁做乜咁窮？睇淡港股嘅，去沽期指，去買put，入場門檻極低。但你有聽幾多人，真係咁做？十個都冇一個。因為佢哋只係把口講，唔係真係敢睇淡。換句話講，唱淡唔造淡，talk is cheap，你話聽日恒指跌1萬點又得，你話後日升10萬點都得，反正永遠唔會錯，講乜都得。但講嗰個唔使上身的話，佢嘅意見，有幾值錢？
當然你可以拗，好多人（其實有幾多人？）睇淡港股，咁佢唔係去沽空港股，而係去買美股，一樣賺唔少——當然可以。但呢個情況，佢根本唔係「睇淡港股」，只係佢覺得美股會升得多過港股，兩回事。
同樣道理，早幾年，你買乜港股都好，人人都話你白癡仔（我就買唔少）。個個話你知，經濟咁差，股市點會好。但佢哋敢唔敢造淡？亦係十個都冇一個。因為佢地自己都唔信自己講嘅嘢，心底中根本自己都知自己唔識，只係把口大大聲。而亦因為佢地只係得把口，所以永遠把口唔使輸，否則呢兩年造淡港股已經輸到甩褲。但佢地唔會，因為冇買，永遠都啱。
再舉一個例子，即使早兩年叫人買iBond甚至綠債銀債，一樣大把人鬧你——經濟好差呀，政府財赤呀，到時冇錢還呀傻仔。但每一次我問，你覺得政府會冇錢還，咁不如我地side bet下？一賠十。細細地，十萬，或者一百萬都得。政府還到息還到本嘅，你輸畀我；政府任何一期還唔到息還唔到本嘅，我賠十倍畀你——但從來冇人敢賭（有嘅歡迎PM），一賠都唔敢貼，可以見到，講嗰個，自己都根本知自己講嘅嘢錯。拋得兩句，即時收檔。
大師日日話股災 有時都真係會中
同樣地，你會見到有好多大師，日日話股災，有時都真係會中，一個壞鐘一日都準兩次，指數調整10%至15%，差不多年年都會有。但，有幾多個真係夠膽買落去，你話呢？不過唔緊要，只要講完後跌，信徒又可以話「大師又中」。今年年頭，富爸爸清崎都講就快股災。雖然佢過去咁多年都咁講，但今次個時機幾好，講完冇耐就關稅解放日，美股幾日跌12%。但又如何？信從咪又係賺唔到錢。更何況，之後美股一路再升，一路再不停破頂。
最後，舊年尾，我都寫過擔心美股今年會有次15%嘅調整，結果真係「大師又中」。同樣地，早排我都覺得，美股下半年又會有個15%嘅回調，暫時唔知準唔準。
但有啲讀者，就會自己跳幾十步，以為話「哦，咁你即係睇淡，咁我要沽曬啲股票了」——錯，唔好咁直線思維！我係覺得會有個15%嘅調整，但冇話「睇淡」。我覺得A隊會失波，唔代表覺得A隊會輸波——事實上，就係成日都會失波（例如籃球），股市就係成日會跌。
仲係唔明？咁根本好簡單，睇多次今篇文最頭一段。咪話倉位代表一切，而我一股都冇沽到，一路買。咁你話代表乜？根本唔使執著於咩叫「睇好」「睇淡」，我瞓身家買股票，你話代表乜？但當然，好多人根本唔會話你知佢買咗幾多。咁佢講嘅嘢有幾多可信性，就你自己諗。
李聲揚
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
