金融High Tea——抵抗北風
2012年9月18日
■聯儲局推無限式QE，美元回軟，金價直逼每安士1800美元，近七個月高位。資料圖片
■內地上證綜指昨大插45點，收2078點，跌幅2.1%。新華社
港股夾在中美股市中間，真係有點身不由己。美股夾QE3同蘋果暴漲威勢，上周抽上五年半高位，恒指承接港股美國預託證券升勢，昨天高開128點，但內地股市一蹶不振，拖累港股再無寸進，要到內地股市收工，才見些少起色。
A股逐級跳水，異常慘情，主要原因係受地產股大幅下跌拖累，數據顯示，包括，廣深在內的十固重點城市本月上旬的成交量比8月上半月減少大約一成。內房股無運行，龍頭中海外(688)算跌得少，跌1.8%，富力(2777)跌4.6%。恒指收市能夠扳回28點至20658點，幸保不失，國企股無運行，國企指數收9781點，跌49點，成交604億元。
聯儲局推無限式QE，美元回軟，金價直逼每安盎司1800美元近七個月高位；加上「十一黃金周」即將來臨，黃金珠寶股齊齊炒到飛起，俊文寶石(8351)及景福(280)仲升得好誇張，分別飆17%及47%！
內地股市急插2％
睇到標題話「抵抗北風」，唔好以為我想講政治嘢，若政治影響唔到股市，我基本上唔想講。呢個題係反映昨日內地股市大插2.1％，但港股好神奇咁守住唔跌的狀況，尾段仲要微升28點(即係0.1％)的現象。
內地上證綜指昨日大插45點，收2078點，跌幅2.1％，大股普遍下跌，原因莫衷一是，包括中國對美國QE3可能推高通脹的不良反應(點解唔在上周五跌？)；中國商務部部長陳德銘周日話，今後一段時間中國外貿發展環境難有明顯改善，令人擔心經濟；中國證監會主席郭樹清近日講，在深化金融改革的過程中，必須顯著提高直接融資比重，令人怕又要從市場抽血；又例如《人民日報》撰文提示風險：話中國經濟增速回到8%以下，轉型逼在眉睫，影響了市場信心等等。
不過呢啲理由抽那一個出來都唔似咁有殺傷力，我不妨加多一個，周日內地50幾個城市有反日示威，部份仲出現打砸搶燒等惡劣場面，今日「九一八」紀念日又到，市場人心不定，怕管理層控制唔住局面，都可能係跌市原因。
但係中環茶友話，過去兩個月內地股市積弱，次次都係拖住港股插，但昨日有個奇景，港股力抗北風，佢大跌我唔跌，特別係下午返來，內地股市由跌1.1％插到跌2.1％，但港股都只係交幾十點跌幅應酬吓，3點內地股市收市後，港股更是一個小鑊回升，顯示有相當大的抗跌力，後市唔好睇得太淡。
昨日港股個別發展，金管局出招降低二套房按揭，對地產股的壓力不大，長實(001)升0.1％，賣緊樓的新地(016)升0.9％，創過高位的恒基(012)回番1.4％。只能解讀為升得多的健康調整，升唔多的直頭當無件事。
傳政府重招壓樓價
市場流傳若樓價再升，政府會加大特別印花稅的徵收率和拉長徵收期來打壓。若然如此效用亦好有限，特別印花稅本身係「大殺傷力武器」，年幾前推出後基本上令住宅樓好難炒。但樓市升得急，偶然都見有零星計埋特別印花稅都賺錢的個案，政府即使令「大殺傷力武器」變成「超大殺傷力武器」，恐怕幫助不大，應可讓僅餘少量炒作住宅個案絕跡，但住宅現時由用家需求主導，唔滿足用家的需求或控制用家的期望，再限人炒樓都無用。
陸羽仁
上一頁 下一頁
金融High Tea 舊文
