超級龐氏騙局
2013/5/27 上午 05:19:11
網誌分類: 經濟
日本首相安倍晉三推無限量寛，西方投資者大捧其場，稱為「安倍經濟學」。不能懷疑安倍推行改革的誠意，因為他不但想大量放水在兩年將貨幣基礎增加一倍，還推出財政政策及結構改革，是想藉低幣值刺激消費，重振出口，令日本經濟起死回生。
但上周四日股一日暴跌7.3%，雖然周五反彈，但已發出警報，「安倍經濟學」係唔係出咗啲問題?與其說中國的製造業數據差嚇親日股投資者，不如說日本自己出咗毛病，我估問題出自兩方面，都係一個源頭，印錢的副作用。
第一個問題係債息大升，日本央行自4月初宣佈推出無限量寬，按理央行買債，債價上升，債息應該下跌，呢個就係美國量寛的模式，美國10年長債債息在美國大印錢聲中曾跌到1厘幾的歷史低水平。日本話無限量寛，日本10年期債息亦一度跟同一模式急跌，在上月5日跌至0.315厘的歷史低位，但到央行真係開始量寛後，日本債息竟然不跌反升。呢半個月內急升，至上周四一度升見1厘，創了一年高位。即係話日本10年債息「衰過做女嗰陣時」，不單回到半年前話會量寛之前，仲要升高過話量寛之前，即係無限量寛不但無進一步抬高債價推低債息，仲推冧債價逼升債息，又點會出現呢種反效果?
日本長債債價在量寛開始後下跌，有兩個可能原因，第一係通脹預期升溫，投資者認為微薄的債息將跑輸通脹，所以沽債去買其他高風險資產。第二個可能係日本投資者對濫印銀紙濫發債有擔憂，日本發債量本來已是全球最高，總債量是GDP的200%，只因國債多數由日本投資者持有，佢地唔會沽，所以日本唔會好似歐洲咁爆債務危機，而家投資者見央行咁印錢法，估到政府將會進一步大量發債穀經濟，對債券前景無信心。我估日債價大跌，同第一個原因即通脹預期關係少，同第二個原因無信心的關係大，因為日股大升，但數據顯示買日股的主要是外國投資者，日本本地投資者卻不斷沽日股，即係話日本人對政府量寛信心不足，或者怕匯價大跌，同時沽日股和日債，甚至走資到外地投資避險。順帶講句日股只是在外資炒作下出現泡沫性上升。
對沖基金Hayman Capital負責人Kyle Bass曾批評日本債券是「龐氏騙局」，仲係超級那種。日本GDP只是美國的三分一，但日央行量寬規模卻相等如美國量寛七成，按比例是美國量寛一倍以上，可見日本印錢之瘋狂，而日本政府五成稅收用來還債付息，一旦債息走高，日本即時出現償債問題。另外日本銀行持有大量日債，若日債價大跌，日本銀行盈利即時受損，亦拖累日本經濟。
日本量寛的第二大問題是愈量寛貿赤愈嚴重。日圓近半年貶值兩成，表面睇應改善出口，改善貿赤，但日本周三公布4月出口按年增3.8%，連升兩個月，但差過市場預期，對歐盟出口仍按年跌3.5%，顯示日圓下跌對推動出口作用有限。但4月入口卻按年大升9.4%，令日本4月貿赤升至8799億日圓，差過市場預期的6211億日圓，係3個月以來最差，連續10個月錄得貿赤。日本的問題是依賴入口能源，大量核電廠停產後依賴更甚，日圓一跌，油價又貴，入口大升，出口升少少都補唔番。唔知往後日本政府會唔會大量開番啲老舊核電廠，以減原油入口壓力。
日本唔同美國，無論美元或美債，都係全球大投資者不可放棄的投資，佢數量咁大，你唔買佢唔知買乜，所以美國量寛不出現走資。但日本量寬卻出現走資，自己人撤出日債日股市場，股市仲有老外炒作托高，債市無人敢掂就係咁跌。如果我係日債持有人都沽，明知美國、日本都係玩龐氏騙局，但日本身子更弱玩得更大，我揸住大手日債，我就沽日債買美債，一來收息多大半厘，二來一年後日圓若再跌10%，仲可以賺埋匯價，到日本停止量寛再回頭都未遲。
雖然日本剛推量寛話佢失敗仲係太早，但搞咗一個月都露出好大裂痕，想靠印錢印出個未來，唔係咁易。美國印咁多錢都未知點收科，中國早兩年印錢已印到一鑊泡，日本又來摻和，真係無眼睇啦。
陸羽仁
(我不在港，暫停答問)
回應(0) 我想回應
陸羽仁 BLOG 舊文
