金融High Tea——債跌收息股衰
2013年5月31日
■里昂出報告話，公用股估值已近二十年高位，相信係投資者沽售套利的高峰期，給予中電、電能、長建和煤氣「沽售」評級，四大公用股昨日齊插超過3%！
武俠小說金句有云，最危險的地方就係最安全，股市興玩相反，變咗睇落最安全的地方，昨日就成為最危險的地方。公用股昨日大跌，恒生公用分類指數暴跌挫逾3%，仲有大行跳出來唱淡公用股。
里昂出報告話，本港公用股在過去數年由於股息率和安全性，成為單邊押注的選擇。即使問題多多，仍然升到癲，例如中電(002)澳洲和印度業務疲弱，電能(006) 及長江基建(1038)面臨上漲的稅務風險。煤氣(003)現時已達30倍市盈率，股息率僅1.7%。
報告預警，市場息率一旦回升，這些問題將浮現，公用股估值已近20年高位，相信係投資者沽售套利的高峰期，給予中電、電能、長建和煤氣「沽售」評級，目標分別為價57元、58元、43元及20元。4大公用股昨日齊插超過3%！
大行唱淡公用股
昨日期指結算，港股高開無幾耐，借住公用股回軟倒插，下晝返來見日股大跌737點(5.2%)，港股轉升為跌，收市恒指報22484點，唔見70點，都算跌得少啦，國企指數跌61點，報10690點，算係無上周日股急挫時跟跌咁多。
日股大插和日圓上升有關，日圓昨兌美元升近100，日股今年最高時升咗53%，?家高位回落咗15%，仲升咗31%。唔客氣咁講句，由於升得太急，即使只係回吐，都仲有水位可回。
繼之前收租股被質低，昨日食息族繼續當災，房託股大幅回吐，領匯(823)跌4%，越秀房地產(405)跌得更甘插5.3%，以佢哋呢啲所謂「穩陣股」而言，咁跌法都好傷。新掛牌的酒店房託朗廷(1270)，開市即告潛水，最低見過4.48元，收市報4.54元，較招股價低9.2%，捧場者今鋪都幾傷。
呢啲收息股咁跌法，和美國國債價近日大跌、相對債息急升有關，早排美國十年期國債債息仲係1.6厘，對上一日收市已抽到上2.119厘，債息急升代表債價下跌，皆因美國近期公佈數據理想，市場估計聯儲局可能會收水減少買美債，誘發債息急升。
美國債息升同港股絕對有關，特別是收息股，市場一直視美國國債債息為「無風險利率」，其餘收息工具，債券也好，收息股也好，按佢哋相對美國國債更高的風險，加一個風險溢價，例如有投資者認為一隻房託相對美債的風險溢價係2厘，美國10年債息係1.6厘時，即係隻房託只至要有3.6厘息率或以上才可以買。好啦，美國10年期債息如今升上2.1厘，那同一個風險溢價，就只可以等隻房託息率有4.1厘時才買，即係話房託股價跌到令股息相應提高，中電等收息股都一樣係咁。
擔心還有第二波
好多人見呢啲股份跌就急住問好唔好買，我睇佢哋仍然唔平，?家撲入去，怕美國債息再升、或股市走勢再差一點時，佢哋仲有第二波插水，太急會買中「當頭跌」，唔係幾過癮。以中電為例，近日升到近70元做咗個雙頂，稍回後連續兩棍急跌，昨收66.949元，好近3個月內的支持位，但拉長一年睇，佢1年內3次回到64元或以下的水平，若忍一忍等佢回到近64元時才買，風險細啲。中電去年派3.8厘息，股價波幅唔太大，入到低位可以息、價齊賺。
陸羽仁
上一頁 下一頁
金融High Tea 舊文
