息升年代
2013/8/16 上午 09:38:30
網誌分類: 經濟
數據積積埋埋就見效。早兩日美國公布的7月零售數據是去年12月以來最好，當時十年期美國債券債價下跌，債息由2.66厘升上2.71厘，股市無乜反應。昨日再公布首次申領失業救濟人數只有32萬，好過預期，以5年最低，令10年期債息急抽到2.82厘的高位，美股就開始頂唔順，杜指大插225點，跌幅1.5%。
其實個邏輯係咁，經濟數據好，聯儲局9月收水的機會就上升，收水代表減少每月買債850億美元的數量，債價下挫，債息就上升。昨日債息上，股市跌的同時，美元亦跌，而商品則炒上，黃金升至1360.9美元，升了2%以上，白銀升到近23美元，大升5%，銅則升了0.5%。而原因亦上高位，紐約期油升到107美元，這也和埃及鎮壓示威後局勢惡劣有關。
油金股匯債齊齊鬱，雖有個別因素，但也和資金流轉有關，美股見高回吐，資金流入黃金那些跌得多的商品避險，按理聯儲局收水應該利好美元和利淡黃金這些商品，但佢地短期走勢卻走了反方向，相信是資金流入觸發淡倉大量平倉所致。
正如我昨日所講，美股畏高，投資者一直捉摸聯儲局收水後合適的債息水平，但債市投資者無股票投資者咁睇好或咁猶疑，一直掟債券唔手軟，搞到債息係咁升，終於令股市都有反應。
除了收水和債息的問題外，企業盈利係另一個憂慮，市場關心第三季盈利是否有以為繼。思科、沃爾瑪、美思的業績展望都唔好，已經有啟示。第二季美股上升是基於溫和但仍顯著的盈利增長，市場原本預期第三季盈利增長較快，但最近已從7月初估計第三季公司盈利增加6%，減到4%。
特別是零售股已進入危險類別。點解沃爾瑪、美思等零售商生意不前，唔係美國人無買?潔A而係佢地轉向更便宜的網上商品買?潔A所以亞馬遜這類公司會受惠。但一間公司得，可能要殺幾間公司。
另外好多企業都在謀殺職位去保持盈利增長，思科系統計劃裁減4000個職位，但今次唔係聽到裁員就升，股價反而急挫7%，市場開始怕這種做法無以為繼。惠普亦下跌百分之四點五，是跌幅最大兩隻道指成份股。
總而言之，全世界都要開始適應利息上升的年代。
陸羽仁
回應(8) 我想回應
陸羽仁 BLOG 舊文
