金融High Tea——大谷網絡消費
2013年8月16日
港股昨日微跌1點，但走勢唔係弱係強，除咗指數一度上去22695點近期高位之外，仲因為上日美股跌0.7%在前，內地股市跌0.9%在後，港股都不為所動，頂住唔跌，而且成交有776億，仲係比較旺。
玩衰股炒利豐
利豐(494)公佈業績後，昨日大升11.6%至11.76元，冠絕藍籌，可謂衰咗咁耐終有反彈。證券界睇完利豐業績後都叫做溫和睇好，例如高盛升利豐目標價至11.5元，維持「中性」評級。
市好炒衰股。利豐業績唔係咁大驚喜，但股價在10元左右築咗底，一等業績無壞消息，就借勢炒番上，但要知道佢如今只係節流增加利潤，唔係生意好轉，所以只宜投機性買賣。
真正強股係騰訊(700)，佢示範乜嘢叫做半日調整。佢第二季賺了36.8億元，是預期的下限，皆因推廣微信的費用大增。佢昨日早段跌過18.6元，低見357.4元，唔見咗5%，但之後大力反彈，一度倒升8元見378.8元的高位，收市略回吐至368元收場，微跌0.5%。若在佢跌到底時敢撲入去，一日都執4.5%。
騰訊咁勁彈，亦同阿爺推政策鼓勵網絡消費有關。國務院昨日正式出台鼓勵資訊消費方案，提出到2015年中國資訊消費規模將超過3.2萬億元人民幣，即未來三年年均增長兩成以上，並帶動相關行業新增產出超過1.2萬億元。
炒網股龍頭掂
國務院預計到2015年基於互聯網的新型資訊消費規模達到2.4萬億元，年均增長30%以上。基於電子商務、雲計算等資訊平台的消費快速增長，電子商務交易額超過18萬億元，網絡零售交易額突破3萬億元。
內地經濟向來以投資、出口、內需三大瓣數帶動，特別以投資和出口為主，但投資不能永遠投下去，出口又因歐美經濟麻麻而放慢，所以推動資訊消費，作為內需新亮點，都係合理之舉。內地券商估計，中央出台推動網絡消費政策後，未來會再迎來新一浪科網炒作潮。
內地科網三大巨頭是騰訊、百度和阿里巴巴。騰訊在移動互聯網稱雄，百度是搜索王者(好比美國谷歌)，阿里巴巴則是網上商務和物聯網的大哥(似美國亞馬遜)，當中只有騰訊在港上市，而阿里巴巴正計劃年底上市，但佢想發A、B股以保住大股東馬雲的控制權，但香港不容許發A、B股，佢可能會到美國上市，所以講到炒網股，真正堅料的龍頭股，在香港只有騰訊一隻，所以股價咁硬。
香港股民唔熟悉內地網絡市場，所以未來若再炒熱網股，必然有大批真真假假網股炒起。
有關近年內地資訊科技產業沿着幾個新板塊推進，包括移動互聯網、大數據、雲計算和物聯網，我估未來要作古仔，都會圍繞呢啲方向去做。
若要講興唔興，未來可能唔興炒賭股，興炒網股。
陸羽仁
上一頁 下一頁
金融High Tea 舊文
