金融High Tea——免疫？
2013年8月28日
■創銀昨日又傳有新買家，作價仲相當於該行最新市帳率約2.3倍。右為創銀行政總裁劉惠民。資料圖片
新興國家貨幣和股市昨日再傳燶味，但香港和大陸好似免疫一樣，唔知係唔係咁好景。內地上證綜指仲要升0.3%，港股跌唔多，只跌130點，跌幅0.6%，比較東南亞地區國家的跌幅，中港股市好似鐵打咁，真係唔知好唔好講咁多新興國家的壞消息。
昨日東南亞那邊落後少少的新興國家個個插，本來大插的兩隻膽繼續領跌，印度股市跌3%，印尼股市跌3.7%，其他東南亞國家唔執輸插埋一份，菲律賓跌4%，泰國跌2.8%，新加坡跌1.7%，真係有冒晒煙的感覺。反映上周佢哋跌完彈一彈，其實企唔定，彈完又再向下。海外投資者大幅拋售區內股票，MSCI東南亞股指呢個月累跌10%！
土耳其又着火
受災國的撲火行動成效有限，印度政府搞基建救市，昨日表示會斥資1.8萬億盧比(約2200億港元)進行一系列基建，企圖重建投資者信心。印度政府的宣佈沒有提振盧比，反而國會在周一決定斥資200億美元(約1550億港元)為該國的窮人提供廉價穀物的決定，令投資者擔心會加劇財赤。盧比昨日一度下跌至接近1美元兌65.56盧比的歷史地位，恐怕未來還要繼續試底。
更大鑊的是，這片新興國家貨幣風暴不但在亞洲發生，在拉丁美洲、南美洲和歐洲的新興國家都在爆煲，例如土耳其。昨日早盤交易，土耳其里拉兌美元創出歷史新低，土耳其里拉兌美元的匯率下滑至1美元兌換2.0095里拉的水平(土耳其里拉匯價由1月高位1.75跌了16%)。土耳其央行為了保護匯率，沽售3.5億美元買入本國貨幣，頂住里拉。土耳其央行在今年7月尾，已加隔夜息0.75厘嘗試支持匯價，但效果有限，上周再加息0.5厘至7.75厘。土耳其已出現貨幣風暴的典型現象，要不斷加息支持匯價，但加息又會削弱經濟，變成惡性循環。
中環茶友話，新興國家把火係咁燒，唔好咁快話香港免疫，希望佢哋快啲降溫，否則好易燒過來。
金融股昨日都麻麻，中港兩地主要銀行股全線向下，大笨象匯豐(005)跌1.2%至全日最低的83.1元收市。內銀四大行都跌超過1.5%。只有績優股有得炒吓，好似隻中國財險(2328)，有大行話財險業績表現屬一大驚喜，股價就大升7%。
創銀又傳賣高價
本地銀行都係賣盤股吸引，創興銀行(1111)認真厲害，有傳媒報道有新買家將按每股40元向廖氏家族提購約60%創銀股權，作價相當於該行最新市帳率約2.3倍，令創銀整體估值達170億元以上。消息令佢股價一度抽高近12%的29.7元，尾市略為回順，亦勁升10%，收29.25元。
8月初，市傳越秀集團將收購廖氏家族持有的創銀股權，作價介乎該行最新市帳率2至2.4倍，其後創銀確認獲獨立方洽購，但未達成任何協議。創銀由8月初的22.5元起炒，唔夠1個月，累積升幅超過30%。
銀行用資本做生意，在匯控市帳率都只係1.1倍的年代，創銀若賣到2.3倍市帳率的價錢，真係無鞋挽屐走啦，2.3倍市帳率作價大約等如31倍市盈率，佢去年賺5.4億，呢幾年都係咁上下，即係話即使長期維持呢個盈利，都要31年才賺到咁多錢，無謂做得咁辛苦啦，唔沽就笨啦。
陸羽仁
上一頁 下一頁
金融High Tea 舊文
