金融High Tea——內房焗住炒
2013年9月11日
美國杜指上日升超過140點，內地經濟數據又好，內地上證綜指續升1.2%至2238點，在強勁的中資股推動下，港股升勢也停不了。恒指收市再漲226點至22976點；國企指數為168點，收報10697點，大市成交亦增至782億元。
中國公佈8月工業產出按年增長10.4%，高於市場平均預期的9.9%，亦比7月增長的9.7%為高。德銀因而調高中國第三、四季經濟增長預測，是繼8月22日後第二次調高。中資股輪流炒上，內房股就在尾市發力，龍頭股中海外(688)及華潤置地(1109)齊漲超過3%。
恒大八月賣樓得
收市後睇到恒大(3333)公佈，佢今年8月合約銷售額114億元人民幣，創今年銷售第一高，同去年同期相比上漲58.8%，同上月相比上漲40.6%，佢話佢8月賣樓增幅係全國第一，內地樓市有「金九銀十」的講法，恒大在旺季前的去貨已創新高，預示旺季應該交到功課。
如今恒大1至8月累計銷售金額641.2億元，同比上漲27.1%，完成全年1000億元目標64.1%，恒大話千億目標實現樂觀；佢又話淨負債率銳減37.7個百分點，成「減負」最快房企；現金餘額增69.6%至419.7億，達上市以來最高水平。
老實講恒大股價可以用大落後來形容，它的問題主要由去年6月21日著名沽空機構香椽唱衰佢開始，股價反覆插，到去年9月跌落2.8元低位，然後大幅反彈到今年1月高位4.75元，跟住以4.35元批股集資45億，批完股股價散晒無晒支持，今年3月宣佈全年業績時更破例無派息，更令人覺得佢唔係幾掂要保留現金，6月隨大市跌落2.66元的低位，最近慢慢上番啲。
以外觀論，恒大先俾香椽打一拳受咗傷，托高批股集資自保，但批完股就無人頂，加上上半年賣樓唔係咁出色，所以股價相當落後，昨日升2.7%收3.46元，現價4.5倍市盈率，無派息無息率，比其他內房股起碼唔算貴，例如碧桂園(2007)市盈率有11倍，當然雅居樂(3383)都係5倍市盈率仲有4.3厘息派。
我覺得恒大落後反映基金佬唔係幾睇好佢，特別對其負債有戒心，但最近賣樓條數好，訂金可以充實現金流，即使唔係睇好其基本因素，都值得一個「投機性吸納」，即係話如果個市繼續旺，可以炒吓落後。
優先股概念見支持
升市主力仍係中資金融股。內銀股此前真係死到直，但呢幾日「鹹魚翻生」。除了「國家隊」力撐同阿爺可能出台救市，最主要是內地銀行將發行優先股呢個概念繼續帶動。中金及人行行長周小川昨日就同時發功，力撐內銀發行優先股的好處。中金列舉三大好處，一係優先股將實質降低核心一級充足率(Capital adequacy ratio)；二係大幅減輕銀行普通股股權融資壓力，測算上市銀行的股權融資缺口將由之前的862億元降為0；三是將每年銀行內源性風險加權資產增速提升2個百分點。市傳「農行和浦發將成為優先股試點銀行」，中金表示，優先股相關規定在三中全會前後出台概率較大，實際發行最快明年上半年。
至於內銀中，民行(1988)一級資本充足率最低，優先股的發行，對佢的資本減壓最有幫助，所以近期亦最受追捧。呢一轉炒內銀發優先股，顯示中央諗橋救內銀，升得有啲道理。
陸羽仁
上一頁 下一頁
金融High Tea 舊文
