對賭
2013/10/10 上午 09:40:32
網誌分類: 經濟
美國總統奧巴馬昨日宣布耶倫出任下屆聯儲局主席，果然起到少少「沖喜」作用，美股連續兩日勁跌後，昨日終於喘定。杜指反彈27點，收報14803點，標普500指數微升1點，造1656點。納指就繼續向下，逆市跌跌17點至3678點。至昨日收市，標普500指數已經由歷史最高收市位下挫了4.1%。
政治僵局已經搞到唔少投資者投曬降，惟有先沽貨作壁上觀。奧巴馬搞唔掂債務上限，唯有加快在聯儲局主席任命上「順應」民意，委任耶倫做下任聯儲局主席，又的確成功轉移市場視線，將注意力重投幾時退市的問題上。政治僵局、政府關門這些壞消息一定程度又變成「利好消息」，同樣會減慢退市。
聯儲局昨日公開9月貨幣政策會議紀要，會議中大多數聯儲局官員都表示央行可能從今年開始削減債券購買計劃的規模，但決定9月維持不退市。聯儲局幾時開始退市，仍然困擾住市場。
耶倫一向支持量化寬鬆(QE)政策，市場預期她上場後，聯儲局即使真係退市，規模同步伐都唔會太快。另外，政府「停運」，好多經濟數據都出唔到，例如上周的9月非農就業數據就難產。沒有數據支持，聯儲局大把理由推遲退市決定。
今年有份投票的芝加哥聯儲銀行行長埃文斯(Charles Evans) 昨日在國基會(IMF)一個小組討論中表示，美國今年經濟增長令人失望，目前狀況更給人「大暫停」的感覺，他判斷聯儲局的退市時間表可能進一步後延。全球最大債券基金舵手格羅斯話耶倫做聯儲局主席後，聯儲局應不會在明年內全面退市(伯南克在六月公布的時間表話明年中全面退市)。
講起格羅斯，佢的債券基金Pimco昨日和富達「對賭」，令市場側目，事緣富達全美最大的資本市場基金公布，全數沽清手上在下周四前後到期的短期國債，消息驚嚇市場，但格羅斯就話佢地的基金和富達做對手，接哂那些短期債券。
富達咁做明顯係怕下周四債務上限到期時，總統奧巴馬和共和黨達不成協議，會令短債違約，債價大跌。不過格羅斯解釋佢地接貨和兩個基金的策略不同有關，佢話若出現債務違約，即使只是一小時或一日，資本市場基金都要馬上把手上持有的國債估值為零，而Pimco的基金不用這樣，所以可以承受短期風險。格羅斯話美國真正違約的賠率是1賠1百萬，但這並不意味違約危機不會影響市場。
睇完富達和格羅斯的對賭，即係話下周四債務到期時達不成協議的可能性不可抹殺，雖然估計最後必定可以搞掂，但過程會好波動，可以視波動帶來的下插係入市機會。
陸羽仁
回應(5) 我想回應
陸羽仁 BLOG 舊文
