中移動要避
2013/10/22 上午 09:36:13
網誌分類: 經濟
美股好靜，週一收市基本持平，杜指只跌7點，標普上漲0.15點，近乎無鬱。華爾街靜待即將出爐的公司重頭業績，和延遲了公佈的9月非農業就業報告。
美股咁靜不如講吓中移動(941)，佢昨天收市後公布第三季業績，數字明顯「走樣」，季度盈利283.7億人民幣，按季倒退8.8%，是該公司歷來第二次按季倒退，亦是自1999年以來最大的盈利倒退。彭博事前統計5個分析員估計，中移動季度盈利有311億元，實數比預期低8.8%。中移動第三季營業額升至159.9億，比分析員平均預估的152.8億元為高，即係生意其實無大倒退，只是成本太高拖低盈利。
中移動業績遠遜市場預期，佢自己解釋原因有兩個，第一是邁向4G增加投資，第二是微信等即時通訊興起，亦搶去好多傳統話音和短訊的生意。另有一個大家都知佢無講的理由，其他兩家電訊商大力搶客，令中移動在手機客戶的市場佔有率由一年前的68%，跌至如今的63%。
中移動前景如何? 佢大大隻，市值1.6萬億港元，去年底手頭現金都有4080億人仔，係全球市值最大的電訊公司，10.2倍市盈率，派4.2厘息，有不少收息擁躉。彭博統計19個分析員平均預估中移動今年純利跌0.8%至128億元，而公司上次全年盈利倒退要追到1999年。中移動今年首三季盈利914.95億元，按年已跌1.9%，問題係佢第四季業績如何，若似第三季咁樣，全年純利下跌一定唔止0.8%咁少，估計佢公布完第三季業績後，唔少分析員要調低佢全年盈利預測。
雖然好多人在推想年底前4G發牌，中移動4G正式商業使用，可望重振業務表現，我就唔太樂觀，發展4G要投入大量資本，問題是4G對增加客戶月費的作用有多大，由2G變3G是質變，用戶可以上網，好多人蜂擁升級，但3G到4G只是量變，帶動增加使用的需求可能比估計少。
我估中移動係一隻有波幅無升幅的股份，未計今天跌幅，中移動今年至今己跌5.8%(今日可能再跌3%以上)，同期恒指升3.5%，佢已跑輸大市。估計佢未來股價在75至90元中間走，短期反覆回吐，若第四季業績更差，要突破可能向下突破的機會較大，除非中移動跌番去近75元、76元，否則都係唔掂佢好啲。若以佢同內銀巨企比較，佢中短線業務風險大過內銀股。
陸羽仁
回應(4) 我想回應
陸羽仁 BLOG 舊文
