「固定觀念」是最大禁忌
2013年11月25日
港股繼續一個大漲小回格局，一回完氣就上。上周五港股跟美股升，升115點，收報23696點，以全周計炒三中概念，恒指累計上升664點，升幅達2.9%。不同類型股份有輪往炒之勢，早前狂升的科網股今轉動力弱番少少，比較落後的內險股、內銀股升勢有力。
科網股以騰訊(700) 為代表，騰訊上周五收424.6元升0.7%，走勢一般。佢其實早過大市見頂，佢10月18日見高位432元後回吐，到11月18日大市上高位，佢最高只見429.6元，不似大市11月高過10月，而是一級級高位向下，進入一個弱勢狀態。
內險和內銀反而擺脫了弱勢，特別內險股更勁，近期愈升愈有，上周五內險股最多升逾2%，平保(2318) 升近3%，成為表現最佳藍籌。新華保險(1336) 遭策略投資者瑞士蘇黎世減持的股份，當中逾一半約52.3%股份獲瑞士再保險接貨，反映外資其實唔係咁睇淡內地保險股，內險股普遍上升，新華保險股價亦回勇，收報27.4元，升2.2%；其他如中國人壽(2628) 升2.7%。
轉炒內銀內險股
以國壽和平保計，呢一浸可謂急抽，過去佢哋弱過大市，甚至弱過內銀，但呢浪上得好急，平保由61元升到73.15元，國壽由21元升到25元，都係幾日內的事。佢地急抽都係因為三中全會消息利好，估計內地投資市場將比較蓬勃，你睇內地證券股如海通證券(6837) 也在過去一個星期內同樣地急升，而銀河證券(6881) 禁售期屆滿，上周五單早就升4.2%，曾創6.47元上市新高，收報6.41元。內險股同證券股根本就係炒同一個概念。
以國壽和平保兩者比較，我不太喜歡平保，覺得佢有政治風險，呢家公司和前總理溫家寶行得太埋，《紐約時報》爆過幾單料，溫家寶聲言起訴，其後匯控(005) 在去年12月悉數減持平保，賣畀泰國卜蜂集團，呢啲大動作惹起我注意，匯控當時以每股59元沽清15.6%平保股權，套現727.4億，以平保現價計賣平咗24%，等如收少咗174億。你可以話匯控做乜咁笨，要急急腳沽？但呢啲大行睇到的風險，或者係我輩老散睇唔到。而且佢揸15.6%平保，要沽咁多貨唔係咁易沽到，所以平啲沽都無壞，結論係平保唔太建議高追，雖然佢升開短線好大機會再升，但要追都追其他內險股啦。
回吐是吸納機會
上周五內銀亦轉強，中行(3988) 升1.1%，建行(939) 升1.3%，招行(3968) 升1.5%，工行(1398) 弱啲升0.7%。內銀整體走勢唔錯，本來10月開始走弱，但呢一轉拗腰上返去，估計可以反覆炒到明年初。
大市整體走勢向上，不宜看淡，升得多時會回，但回吐是吸納的機會，不要太擔心一回吐就沽清股票。如上所述，大市炒作的題材有少少變，由過去大炒科網股，轉番去炒中資股，主要因為外資看好三中全會的改革決定，吸引資金回流。
舉個例有「歐洲股神」之稱的波頓接受《金融時報》訪問時就話，三中全會上周提出的改革方案令人印象深刻，將成新投資題材，預料將吸引外資重投中國股市。波頓2010年出任富達中國特殊情況投資信託基金，期內中國股市成為全球表現最差的股票市場之一，佢都中中哋招，但近年開始翻身，他將於明年4月退休，臨尾繼續睇好中資股。
沽神轉膊睇淡黃金
股市氣氛會轉，炒作題材會轉，做人最緊要識轉膊。近年炒金炒到好燶的對沖基金經理、沽神鮑爾森，最近宣佈投降，不再加注黃金。鮑爾森在2007年睇淡美國樓市狂沽一炮而紅，近年唔係咁順。佢早在2009年開始一直睇好黃金，點知金價見1900美元後大幅回落，單計今年以來都跌26%，近年一直唱好金價長遠前景的鮑爾森，終於話不會向旗下黃金基金再注資。
鮑爾森的投資旗艦Paulson & Co.日前舉行股東周年大會，佢在會上向客戶表示，他個人不會向旗下黃金基金PFR黃金基金投放更多資金，理由是看不透通脹會在何時加快上升。
鮑爾森自2009年開始看好黃金的理由，是金融危機期間各國印鈔將刺激通脹加劇，黃金可起到對沖通脹的作用。鮑爾森睇住旗下PFR黃金基金的資產值，真係好難硬撐，PFR黃金基金資產值從去年底的10億美元(約77.5億港元)，蒸發63%至3.7億美元(約28.7億港元)，單計今年10月減少了1.2%，鮑爾森表示，將維持該基金的金股倉位，並讓基金內的黃金相關期權持至到期。期金上周五報1240美元，好弱，主要因為市場預計放水高峰快過，美元價值開始出現，資金就從黃金走人。鮑爾森由金價1500、1600美元一直買，跌又撈，都幾傷。而客戶見佢唔得，不斷從基金贖回資金，亦令有關基金減值加快。
鮑爾森由2007年的沽神，到買金變燈神，只顯示一個殘酷的事實︰市場難測。大家要接受事實，市場走勢唔易估到，要識轉膊。
邱永漢專買成長股
這裏我想到日籍投資專家邱永漢的格言，呢位老人家已離世，但他的投資經驗還有很多值得借鏡。他提過投資的最大禁忌係有「固定觀念」，墨守成規，佢話如投資環境已經起了變化，如果仍舊堅持自己過時的看法，必然被時代所淘汰，屆時雖是「老將」也只有「死路」一條。
佢由一個外行人變股評家，話股票投資最重要一點，還是在於不要被「固定觀念」所困，潮流會變，但不是每個人都會發現。佢話「這是因為我沒有內行人的思想包袱。我是外行，不受傳統選股理念的束縛。大家喜歡買大公司的股票，大公司是成熟股，我要買的是成長股。甚麼股票賺錢，那要看社會的發展趨勢。」佢不買當時最大的日立、東芝和日本紡織等第一流的股票，要購買千代田化工、佐藤工業、日本火腿等無名股票。他睇到那些公司的成長，所以大賺特賺。
邱永漢的經驗是，第一唔好跟足固定觀念死做下去，第二要自己搵到成長股。前者較易，後者較難。可舉一個小例子講講，中移動(941) 過去是好股，好多人鍾意，但佢走勢近年明顯弱晒，和科網股如騰訊興起搶佢短訊和長途生意，以及電訊業內競爭加劇有關。如果因為中移動過去好，死要買佢，何不轉買昆侖(135) ？昆侖雖然升咗唔少，最好等佢回啲先買，但一隻成長股16.8倍市盈率(昆侖)，和一隻呆股10倍市盈率(中移動)，還是成長股抵買。其他可能也會盈利增長放慢變呆股的股票如內銀股，好似建行(939) 只是6.5倍市盈率，點解還要買10倍市盈率的中移動？這就是觀念變唔變的問題。唔係話中移動一定唔升，不過佢就算升都會升得慢過人啫。
陸羽仁
金融High Tea 舊文
