玩盡油股
2013年12月13日
港股繼續調整，家個市等緊兩樣嘢，一係下個星期聯儲局開會，到時會否真的啟動退市;二係接近年尾，基金會開始砌番靚少少指數埋單。由於家仲係月中，估計大戶會放手等個市浮浮沉沉，自己上落吓先。投資者假如已經動用資金入了第一注貨，可以等待大市再跌啲，睇吓有無機會再執一注。
內地媒體報道，發改委兩個司分別邀請專家召開「油氣改革」徵求意見會，有接近中石油人士稱，中石油或根據產業鏈分拆方式，將整個企業上中下游全部打斷，成立幾個專業公司。市場預料，最有可能方案是分成勘探、管道、冶煉和終端銷售四個公司。
油氣改革危機並存
有中環茶友將呢個消息放喺政治層面去睇，話最近出身石油系統的前中共政治局常委周永康被查的消息滿天飛，北京對此不發一言，令人相信傳言已經成真。過去一年，石油系統已經不斷傳出人事大地震，周永康出事，舊有派系失去保家，同時有可能觸發利益調整。現屆政府要打破壟斷，增強市場機制運作。
「三桶油」(中石油、中海油、中石化)被視為壟斷經營最大得益者，過去長期坐擁巨大利益，成為打破壟斷目標並不出奇，尤其石油領域的改動，影響不會如銀行擴散得咁廣，無論在政治、經濟考慮，都有可能成為改革對象。
幾個月前，石油系高層出事，令相關板塊出現回落，最明顯係主打天然氣業務的昆侖能源(135) ，股價一度插近10元水平。當時陸羽仁睇法係「鐵打的衙門，流水的官」，如果股價抵買，就值得撈底，結果一輪震盪後，昆侖股價真係見底回升，到昨日高低位計差不多有三成利潤，計落相當和味。
石油同銀行系統一樣，係巨大到不能倒的行業，人事變動不會影響企業根本運作。行業改革情況就稍有不同，由於整個經營生態轉換，影響要仔細觀察。正常情況下，中央唔會用好急驟的方法，一下子打垮幾個龍頭，比較可能的方法是逐步微調，減低影響，一如當年電訊市場，在中移動外培養起聯通、中電信去增加競爭，故此石油業同內銀、電訊業一樣，變成宜炒不宜揸的板塊，對投資者嚟講，有危也有機，要玩盡油股，最重要係識得靈活走位啫。
信達成交「墟冚」
昨日大市連跌三日，跌穿50天平均線(23296) 。恒生指數收報23218，跌120點；國企指數收報10962，跌111點，成交微縮至715億元。焦點係首日掛牌的信達資產(1359) ，股價高見4.79元，較上市價3.58元，大升1.21元，升幅接近34%，收報4.5元，較上市價高25%，每手1000股不計手續費賺920元，成交金額達110億元，場面「墟冚」。
信達掛牌表現不俗，野村隨即發表報告，首予「買入」評級。報告指出，野村對內地資產管理市場的前景樂觀，尤其當經濟改善後，信達更能受惠於資產價格市場蓬勃，給予5.1元目標價，相當於1.7倍預期市帳率。由於累積升幅太大，散戶想入貨最好先等佢回一回。
其他掛牌新股就同人唔同命，內地煤炭港口秦皇島港(3369) 全日「潛水」，收報4.92元，較招股價低0.33元或6.29%，每手500股不計手續費蝕165元。中國東北地區醫藥和醫療保健產品零售分銷商金天醫藥(2211) 一樣「全日潛」，收報2.37元，較招股價低18.56%，每手蝕540元。
陸羽仁
金融High Tea 舊文
