唱好為搵食
2014年01月02日
美股在最後一個交易日高收72點，臨尾都要再創一次歷史新高，表現喺主要市場算係強到無朋友。華爾街狂牛由年頭走到年尾，創了13年最強紀錄，終於令到港股全年有650點進帳，周二收報23306點。港股在美國預託證券市場普遍堅挺，估計今日港股應該有條件高開，跟住就要睇新一年，內地股市點走啦。去年炒股跟西風好過東風，西方吹起科網股熱，大家買吓國產科網股，收穫都算唔錯。相反，國企股回報大體就唔係幾唔得，年尾埋單，股神巴菲特揸重貨的富國銀行，取代咗工行(1398) 成為全球最大市值銀行，就係西風壓倒東風的證明，估計備受散戶鍾情的內銀股，今年都係有反彈無升幅。至於威過幾年的資源股、內房股2013年都交唔到功課。
2013年西風壓東風
埋單計數，去年恒指全年升2.6%，仍然跑輸通脹(約4.3%)。比上大大不足，但又唔係最衰嗰個。截至12月30日收市，美股三大指數杜指、納指和標普500分別上漲26%、38%及29%；歐洲三大股市英國升14%、法國升17%、德國大漲26%；亞洲市場，日股升勢可以用癲嚟形容，勁升57%！台灣及馬來西亞唔輸蝕，上漲超過一成。全球主要股市，最差嘅仍然係內地A股。上證綜指全年跌6.8%，仲係連續第四年包尾，可見港股無運行，主要係受內地股市「熊霸天下」拉住後腿。
2014年點睇？市場觀點頗為分歧，有唔少人係樂觀派，認為全球股市仍然暢旺，內地股市更係否極泰來。港股方面，在美國長債息率趨升，內地推行深化改革、適度去槓桿下，相信資金將繼續追逐高增長、國策扶持股份。坦白講，呢啲咁樂觀嘅分析，唔係陸羽仁心目中的睇法，不過既然好多人包括大行話咁睇，就不妨講吓佢哋睇法先。
綜合大行及分析員意見，除了對股市講得比較樂觀，仲提出今年三大當炒的板塊，包括濠賭、科網及環保股。花旗預測，澳門今年博彩收入可按年升15%至每月510億澳門元，行業前景仍可看好，因至2015年年中之前，暫不會再有新賭場供應，料板塊應可續獲市場重估。摩根大通表示，雖然濠賭股今年以來累升逾80%，但仍看好可於2014年續跑贏大市，目前市場料行業可達10至15%合理增長，該行料濠賭股今年盈利增長可達20至25%，首選永利澳門(1128) ，該股過去兩年跑輸同業，可追落後，目標價上望40元。
樂觀預測不能盡信
大行另一主題，就係「美麗中國」推動的節能減排，預計明年仍然係中央指定的主投資主題之一。國家主席習近平於今年7月時曾鼓勵業界要再接再厲。環保、新能源股被中央視為朝陽產業，明年當可繼續熱炒。講完大行睇法，有茶友問點解陸羽仁話佢哋係樂觀派呢？皆因每年開始，分析員和大行預測前景，多數都係上望目標有幾高，去年港股開局係威係勢，分析家愈唱愈心雄，大鬥大下，有人大膽預測恒指可見兩萬七，結果係點呢？就係大家都信港股有排升之際，佢就掉頭回落，跌穿兩萬點，跌足四千點、跌到人心惶惶先見底。點解大行同分析員多數係上望目標而唔係下望目標呢，皆因買股無限制，沽空有限制，唱好點都易做生意過唱淡，所以年頭贈興，梗係唱好多過唱淡啦！但究竟最後開大開細，係同人嘅主觀意願無關，最重要都係睇錢流、資金流，所以簡單講，有時市場大合奏，唱好都係為搵食啫，總之依家大行話看好，年頭如果有得炒一浸，就不妨跟吓先，等到農曆年過後，醒目者就要睇係唔係會轉勢囉！
陸羽仁
金融High Tea 舊文
