人生如搞公司(情人節篇)
2014/2/14 10:22:27
網誌分類: 經濟
美股抖氣又再上。昨日先低後高，小幅收高。杜指重上16000點，收報16027點，升64點。標普500指數升11點至1830點。
美國12月零售銷售調0.1個百份點至上升0.1%，1月份更下滑0.4%，市場預期與上月持平。最近一周的首次申領失業救濟金人數由上月的33.1萬輕微增加至33.9萬人，亦差過預期的33.5萬人。惟12月商業庫存上升0.5%，略為有好預期的0.4%。
經濟數據麻麻，但股市造好。主要原因係大家都知數據唔好只係因為極寒冷天氣影響。報告顯示當月的汽車銷售及餐飲業消費都有明顯下滑，分別跌2.1%及0.6%。天氣太惡劣，好多戶外工種都要暫停，唔少人索性唔返工去申請救濟。投資者見到經濟唔好的原因係受到短暫的天氣影響，所以都當佢冇到，照入市如儀。
不過，這有分析指出，上月零售數據咁弱，已經釋出一個經濟疲弱的訊息，12月零售消費有增長，可能只係消費者應節的一次性消費，並非因為預期經濟復甦，開始願意消費。當消費者唔敢或者唔肯消費，經濟增長好極有限。
市場昨日的大新聞係美國最大的有線電視、寬頻網路及IP電話服務供應商康卡斯特(Comcast)擬以452億美元收購時代華納有線 (Time Warner Cable) 全部股權。有分析指出，美國監管當局可能會因交易規模太大，造成壟斷的可能，不會輕易同意放行。而Comcast的執行長Brian Roberts卻好有信心監管機構戶會開綠燈放行。他指出時代華納有線現時有1100萬用戶，但合併後會放棄300萬用戶，令到集團合併後用戶數目維持在3000萬戶，佔整個美國付費電視市場少於30%。
時代華納有線股價昨日勁升7%至144.81美元，但仍遠低於Comcast每股158.82美元的出價。反映投資者擔心交易可能遭遇監管阻力，落注唔敢咁勇。
講人生如搞公司，見今日係情人節，當然要講到伴侶的一部份，這可以係最唔關事的部份，因為伴侶若好合拍地好，似如魚得水，根本唔覺有任何問題。但也可以係致命的部份，可以好唔合拍，也可以好合拍地送你上路。我會形容為公司CEO與老闆的關係，你係CEO，你伴侶是老闆，佢可以在幫你，也可以阻你，可以幫你做對，也可以阻你做對。
唔好介意好大抄特抄網友落錯車的留言:「我的人生正如陸SIR所言, 年輕時太順遂了, 不經意入了公營機構, 有一份很不錯的收入, 又不經意買了層樓, 有了一個安樂窩。未夠三十歲已有車, 有樓, 有老婆, 仲有個女。幸福來得太易, 於是四年前, 就賣了手頭上自住樓, 信心滿滿的等跌市, 以為可以等跌就一次過買入兩層樓, 安享晚年, 結果不用說…跟我原先的想法背道而馳, 老婆對我的埋怨亦日夜加深。學陸sir話齋, 「千金難買早來輸」，還好我輸得仲早, 今次買到個教訓, 再有下次就不會再草率行事! 親身體會, 只要一講到層樓, 兩公婆就傷感情, 如果關係不夠穩固, 真係好易勞燕分飛。但樓是死的, 人是生的, 一個愛你的人待在身邊才是最重要。你看富婆龔如心坐擁幾多物業, 但到頭來卻要用錢去買愛情, 還是一段完全沒有真心的關係。」
「小貓網友說『如果選著一個和自己有相同幸福標準的對象,就能在共同奮鬥的過程中,得到幸福,而且很容易相愛相惜相重。』我很喜歡這句說話。我的人生之可以那麼安穩, 全賴有一個好老婆。我是大花筒, 愛冒險的性格, 我也很清楚自己的缺點。所以, 賣樓後大部份錢存放在老婆手裡, 而我手上的一小部份錢全輸光在股票上了。雖然收入比老婆多很多, 但老婆慳吃儉用, 每月也有靠她來儲蓄。如果沒有她, 相信我會連最後惟一的首期也會輸光。人到中年才一無所有, 那時真的可以說是萬劫不服了。這些不幸的故事, 相信陸SIR也聽到不少。」
「最近租約到期, 又到煩惱的時候。老婆當然好想置業, 但我真心覺得現在入市時機不好。以炒股票的角度來說, 完全是低沽高追的格局。我記得陸SIR講過樓是極長線投資, 如今等了四年, 時間好像很長, 但如果將四年放到整個人生的時間表上, 其實很短。我就這樣告訴我老婆, 希望她可以跟我一起等。其實, 老婆因為層樓已經唔開心咗幾年, 如果而家高追又跌市, 咁佢豈不是又要唔開心多唔知幾多年, 我真係唔想佢再為層樓而煩惱。」
「我還有幾年才40歲, 時間應該還是有的。老細對我很賞識, 正現努力裝備自己,準備隨時搏升職加薪, 小女兒還有一年多就可以升上津小, 這樣一加一減, 相信我們一家的經濟環境在未來兩年會大大改善, 那時候再上車, 陸SIR你說是不是更好?」
一般而言，男人覺得自己識嘢，愛冒險， 喜投機。女人覺得自己無識咁多，穩陣啲，愛買磚頭長揸，買股都買大籃籌。(當然有例外，我也見過好爛賭的女人) 好似落錯車的例子，他在2009年就沽了樓等跌，想在跌市買番兩層樓，這是賭眼光，也有相當的投機性。若落錯車有兩層樓比較好辦，自住的唔鬱，投資的可以出入，投資樓沽低咗無所謂，但自住樓沽低咗又要租樓會好痛。以我自己為例，自住樓24年無沽過，陸太是穩陣人，同佢講沽自住樓好難，所以我自訂目標，若不是超高價，講都無謂，而超高價從無到過，所以亦無謂講。
愛冒險的人，有個穩陣的另一半，是一件幸福的事，所以落錯車其實是幸福的，另一樣幸福是犯錯得早，30幾歲，未來還有機升職加薪，收入會增長，唔驚買唔到樓。
小貓網友話最好有一個「和自己有相同幸福標準的對象」，這一點十分重要，伴侶在大方向上要同步，你要上進，佢叫你唔好咁博不如玩吓，你要儲蓄，佢叫你不如去今年第十次旅行，你唔想賭咁大，佢咁你舖舖同人曬冷，希望明天發達，大家道路不同，好難長期走下去。年青人拍拖好易俾個樣迷惑咗，其實香港小姐日日見都會變得平常，個樣普通少少睇得耐咗會習慣，有研究顯示男女朋友其實相識三個月就開始熱情冷卻，娶咗香港小姐的人，一樣會昅路過的靚女，所以睇性格重要過個樣子，性格唔好，好難長久一起生活。
任意妄為的CEO，要有個穩陣的老闆管住。你要首先發現自己有乜唔好，最好搵個在自己性格有缺憾的伴侶，以補不足，如果男人有個爛炒的通病，就搵個老婆鎖住自己的錢，唔好俾自己亂搞啦。佢收曬你份人工，無得俾你炒，你無曬自由，今日情人節你仲要多謝佢，因為佢減少咗你出軌的機會嘛。
陸羽仁
回應(5) 我想回應
陸羽仁 BLOG 舊文
