炒股當宣傳
2014年02月14日
港股升咗幾日後回吐，暫時壓力唔算太大，大行繼續出口術，匯豐證券唱好旺旺(151) ，股價愈升愈有，成為表現最佳藍籌，收報11.16元，大升6.5%，其他環保、醫藥股相繼撩高，搵嘢炒維持氣氛。
高追隨時買貴
儲局一姐耶倫發言有利股市，但是否會一口氣造好，又係另一個問題。因為美國失業率已愈來愈逼近6.5%的加息警戒線，雖然耶倫口氣轉軟，話就算逼近呢個觸發點，都未必要即時加息，但央行退市加上超低息唔知再維持幾耐，個市升得急，可能又有壓力。
美股如果唔可以一口氣上升，港股都無條件爆上，指數去到阻力位，資金就會輪流炒，所以散戶只宜吼準有機會當炒的板塊低吸，不宜高追。
好似石油股，炒咗兩日後雖然油價高升，昨日都出現回吐，心急追貨就會即時買貴咗。
恒指係20天線阻力明顯，加上內地股市都有回吐，港股尾市最多跌187點，低見22098，臨近收市前沽盤收斂，險守22150收市。
恒生指數收報22165，跌120點；國企指數收報9872，跌124點。大市?家睇22000支持夠唔夠，若然企穩，再上22300成第一個阻力，若升穿該位，下一步可望挑戰50天線(22845) 。
大市除咗炒隻旺旺，科網同環保都有追捧。騰訊(700) 曾創新高，高見548元，全日升0.37%報540元；獲騰訊入股的華南城(1668) ，股價抽升7.6%收報3.84元。
近期同騰訊鬥得難分難解的阿里巴巴，影子股中信21世紀(241) 股價午後狂升，重上3元關，全日飆24%收報3.36元。阿里喺美國接連出招，併購之餘又話要進軍美國網購。
坦白講，阿里係地頭龍，去到花旗國有無咁威，實在大有疑問，但炒股講噱頭，佢未上市已經動作多多，變成益咗中信21世紀概念不斷。有人話，呢招係隔山打牛，阿里想上市有特殊待遇，點知惹起好多反對聲音，認為無理由見佢大隻就特別開條貴賓通道俾佢，尤其上次佢喺香港掛牌，無乜益到香港股民。面對市場咁反應，阿里班老闆一向同中信關係良好，?家先同老友整隻股炒吓，搞到股民如癡如醉，就當係上市時的宣傳費都抵啦。
環保股有兩會概念
科網係舊年已經當炒，另外近日環保股都有啲氣氛。國務院安排100億元人民幣，對大氣污染防治透過「以獎代補」方式，進一步加強霧霾等大氣污染治理，個別環保股逆市走高。
光大國際(257) 升3.28%報10.72元；中滔(1363) 漲7%報5.2元；龍源(916) 走高0.52%報9.65元；北控水務(371) 揚4.83%報4.56元；比亞迪(1211) 重返國指成份股行列，股價突破40元關，飆6.04%報42.15元。
預期兩會可能都會講吓環保同綠色發展議題，呢類股份應可列作低吼短炒目標。
陸羽仁
金融High Tea 舊文
