悶市小綠洲
2014年02月11日
上個星期美股造好，港股高開，可惜唔係咁夠力，好快就下沉，反而內地股市表現比港股有力，復市以來連升兩日，上證及深成兩大指數昨日齊齊升逾2%，而且愈升愈有；相比之下，恒生指數及國企指數昨日雙雙報跌，尾市更是跌勢加劇，滬深兩市明顯跑贏。
港股馬力唔夠
今次外圍升，內地升，港股獨跌真係無得賴，擺明係自己馬力唔夠，反彈兩日後腳軟，早段最多僅升51點見21687，其後大部份時間回軟。三時過後跌勢轉急，最多跌112點見21524，尾市跌幅略為收窄，全日收報21579，跌57點；由於內地復市表現暫時叫做唔錯，國企指數一度上升，可惜最後收報9613，都跌31點，成交金額回落至604億元。
港股馬力唔得，主要係無乜大板塊發到力，傳統地產、內房、內銀都仲係有反彈、無升幅，做唔到火車頭。
若果按技術派股友就所講，現時10天線(現處21699)及上周的下跌裂口底部(21742) 為短期阻力所在。曾經強勢的濠賭板塊過年後變成弱股，銀河娛樂(027) 挫2%報69.6元，金沙中國(1928) 跌1.7%報58.2元。
悶市中，手機股成為小綠洲，中國電信(728) 向終端廠商發出需求，表明近期4G終端需求量在百萬部以上，同時明確要求首季要有超過30萬部上市，帶動手機股再獲炒上。
晨訊(2000) 揚3.66%報0.425元、TCL通訊(2618) 漲4.83%報9.11元、中興(763) 亦高2.31%報15.94元；聯想(992) 受惠升2.38%報8.62元，為表現最佳藍籌。
市值細細的酷派(2369) 仲搶晒鏡頭，佢再抽升8%報4.89元，表現一馬當先。早排我同中環茶友講起手機股，佢話?家好多人推介聯想同酷派，既然係炒，當然係炒細唔炒大，係唔係呢？
我答話，對於聯想同酷派都有留意。早喺舊年科網股興起時，市場狂炒金山軟件(3888) ，理由之一係唔止炒公司業績，仲炒埋佢老闆雷軍會將名下的小米手機業務注入，內地手機市場唔係咁開放，內地生產商變成有近水樓台先得月之利，單係做一個內地市場，已經食到滯，故此小米概念非常煞食。後來，雷軍澄清話公司一旦上市，就有向公眾股東交代的思維，對企業發展有時會成為制約，否定在短期上市的可能，係少咗一個落注對象下，自然對其他手機股有利。
手機股郁郁貢
講到聯想同酷派，前者係恒指成份股，已係藍籌企業，市值大，加上最近再出招收購電腦業務，「溝稀」咗手機概念，好處係分散咗風險，代價係炒起上嚟無咁好味。
酷派喺一二年起力谷智手機業務，銷售規模的增長錄得新高，陸羽仁睇過不同的市場調查公司的報告指出，酷派智能手機在中國內地整個3G智能手機的市場份額，大約都係排係前幾名，不同調查會略有一、兩名的差異，但都算係內地前列手機供應商之一。而家該股市盈率差不多32倍，比一年來低位升了超過兩倍，單單2014年以來已累升92.5%，升幅真係幾得人驚。由於手機業務年前開始已經有盈利貢獻，部份利好因素開始在股價反映。從炒賣角度嚟睇，內地智能手機供應仲未見頂，加上佢市值剛過一百億元，都仲可似算係容易食嗰類。
陸羽仁
金融High Tea 舊文
