微利年代
2014年02月26日
兩會前夕，市場觀望氣氛濃，不同板塊輪流受考驗，上個星期濠賭股傳出中央可能縮短賭牌年期影響窒一窒步，跟住到內銀受限貸傳聞影響，仲有另一個受衝擊板塊就係證券股。
由於騰訊(700) 有意夥拍證券商做生意，市場擔心會對證券股造成衝擊，於是憧憬因為兩會有政策炒過一陣的證券股，好多都跌咗落嚟。流動通訊興起，大家有無限聯想，包括好多傳統媒體，都認為呢個係搵銀新時代，覺得網上新媒體可以包攬或取代傳統媒體的廣告生意。
不過，facebook(fb)收購即時通訊軟件WhatsApp一役，就話咗畀呢個世界知殘酷的現實和好多嘢原來都係唔美麗的誤會，包括網上媒體新陳代謝好快。曾經被視為後起之秀的fb，原來已經美人遲暮，要靠同WhatsApp聯婚來保持青春。
網企不能靠收廣告
10年前年輕人上fb傾心事被視為有型有款，現時由於父母都識上去，於是新一代視佢為老土嘢，作為萬億巨企，好似身家億萬的富翁，豪花一筆娶個年輕太太買回青春，只是所費無幾，所以fb迎娶對方，講明旨不在用來賣廣告賺錢，佢呢個動作，間接說明搞網媒仲諗住賣廣告發達，已經唔係咁Work，因為好多網絡公司，做的都是微利生意，靠收吓廣告費點賺大錢。
有做過科網公司的中環茶友話，網友唔鍾意睇廣告，網上媒體賣廣告空間細小，呢啲限制都令科網公司好難靠收傳統廣告生存。美國傳媒轉型，講嚟講去都係《紐約時報》等幾間較成功，但都唔係真正食到乜大茶飯。現時真正成功的美國科網龍頭，好多都開始唔吼廣告生意，因為廣告由傳統媒體轉移到網上，可能只係收得番一、兩成的廣告費，根本唔夠維持日益龐大的營運費用，所以好多科網公司，好多都係諗緊借助新科技直接做電子商貿。
證券股成新受害者
美國科網巨企如是，內地科網龍頭一樣亦步亦趨，好似騰訊、阿里巴巴，全部都諗緊直接做埋金融、做零售，想喺傳統產業最好賺的行業搶生意。佢哋去搶傳統銀行、證券或零售公司生意，成功與否未知，但肯定就令相關行業出現惡性競爭，令相關行業成為微利生意，券商股就成為最新受害者。
傳統企業面對新挑戰者，必需要重整陣容對付，佢哋能唔能夠企得住，好視乎佢哋有乜核心競爭力，如果你只係能夠鬥平，咁就好大機會死得，但如果你係有品質的產品或服務，調整一下成本結構，肯賺少啲錢，或者仲可以生存。總之，係微利世紀來臨下，無論係企出來挑戰的科網企業抑或傳統大公司，點樣可以繼續生存係好大考驗。
近排淡友逐個板塊轟炸，人民銀行收水無手軟，再正回購千億元人民幣，炸散內地股市，滬深兩市分別插2%及3%，加上匯控(005) 業績差過預期，港匯又跌穿7.76水平，反映資金有流走跡象。美國杜指高收，標指仲創埋歷史新高，點知去到香港開市諸多不利消息，累港股全日呈虎頭蛇尾走勢，一度倒跌過百點，尾市沽盤收斂，恒生指數收報22317點，跌71點；國企指數收報9740點，跌57點，成交金額由昨日的571.7億元，增加至654億元，市場氣氛認真麻麻。
內地再傳杭州、江蘇等多個大城市樓盤降價促銷，周初急跌的內房沽壓未停，相反，早前受續牌陰影困擾的濠賭股有番反彈，金沙(1928) 升咗4.5%，不過係咪重納升勢，仲係好有疑問喎。
陸羽仁
金融High Tea 舊文
