搶食肥豬肉
2014年02月27日
港股昨日平靜，《財政預算案》公佈，各項措施以至理財策略都係事前傳晒出街。今次《預算案》減少咗派糖，但之前《施政報告》已有大動作，社會反應唔大，最多人講的，反而係前報紙老總被人斬咗六刀，無論因為乜嘢原因，使用暴力都要譴責，如果係因為言論，咁就罪加十等，希望警方做嘢，證明到香港係法治社會。
財爺昨日講預算案，提到要開源節流，包括要研究開徵銷售稅，中環茶友聽完，個個都話係狼來了，因為以現時的政治氣候，唔好話要過立法會，單係要過特首個關都已經難過登天。有茶友坦言，今年雖然盈餘少咗，政府又洗大咗，但暫時睇唔到財政有長期赤字憂慮，喺咁環境下，政府又咁弱，試問點可以開徵到新稅呢？
中資投地勇過港資
茶友話，香港長年行高地價政策，根本已經係徵緊銷售稅啦，只係徵稅對象係中產以上人士，只要香港樓市不死，加上未推行普選，特首根本無足夠的民意授權，都好難推其他新稅喎！
新稅同普選有乜關係，陸羽仁唔係專家，但政府財政同地產好大關係，呢樣嘢就非常清晰。今年利得稅收入無想像中咁好，據講其中一個原因係地產商賺錢少咗。睇番昨日信置(083) 公佈截至去年底止上半年度業績，期內物業銷售總收入112.25億元，按年跌88%，股東應佔純利50億元，同比減少38%。信置賣樓減少，相信唔係個別情況，其他龍頭發展商，好多都遇到呢種情況。
雖然發展商賣樓難咗，但唔代表政府賣地收入一定會少咗，前兩日啟德三幅地開標，結果成交價都超過市場預期，有人計過數一呎將來要賣1.7萬元咁高。
啟德樓價日後賣唔賣到1.7萬咁高，陸羽仁唔敢講，因為今次中標財團，出價最勇係中資保利(119) 。之前啟德的港人港地，同樣價被中資高價搶購。現時政府打壓樓價，本地發展商唔敢再高價投地，但內地發展商就視為搶佔香港市場的機會。喺內地做地產，如果公開投地又納正稅，毛利好多時得一、兩成，內地發展商做慣咗呢種薄利生意，喺佢哋眼中，香港地產係風險低，毛利高的肥豬肉，有咗佢哋加入嚟搶食，本港地產商可能又進入微利時代！
靜市諗吓「打新」
內地股市回穩，港股止跌回升。午後中石化(386) 、騰訊(700) 及友邦(1299) 發力，令港股尾市一度升達185點，恒指收報22437，升120點；國企指數收報9806，升65點。
中石化、騰訊及友邦為升市主力，合力拉高恒指81點。繼早前宣佈引入民營資本重整旗下銷售業務後，中石化董事長傅成玉再放風，透露「兩會」期間會有進一步改革消息，股價升4%，收報6.64元，表現頗為搶鏡。其他搶眼股份仲有比亞迪(1211) 入圍北京首批新能源車示範應用目錄，同時在天津推廣新能源車及北京加快充電樁建設，刺激比亞迪飆近一成。
酷派(2369) 公佈首款一千元人民幣內的4G手機，同時獲高盛將目標價由5.2元上調至6.1元，股價大升13%，報5.07元；其他手機股亦造好，睇嚟呢類股份鑊氣仲未完。
有中環茶友話，如果唔想炒呢類累積升幅大的股份，可以考慮吓「打新」，認購吓隻保利文化。
陸羽仁
金融High Tea 舊文
