青心直說：當總理係電兔 - 胡孟青
■筆者認為，昨日股民一開閘就追住隻電兔跑跑跑，個個當正總理係電兔，贏咗就個個扮專家。 美聯社
黃子華話齋：「世事無絕對，只有無頭緒！」
內地貿易數據果然差勁，望天打卦，果然越差越有希望，不是總理有頭緒，效法諸葛亮借中港股民資金之「東風」，稍出幾度板斧，港股早已在兩萬三關前行人止步。
炒差價贏咗扮專家
早前對科網股如癡如醉的本地股民，驚魂甫定，又有新炒作目標，理得李總理開動的直通車只是滬港一線通，好多「羊生羊太」自己爬上了另一班未開的「深港通」。
連A股在深圳掛牌唔關事的浙江世寶(1057)、細價股兼且業績長期見紅、改名博轉運的北人印刷(現名為京城機電，187)，都可以炒到飛天。
以炒差價作為飛撲入市的擋箭牌，當正A、H股已經係可以互換一樣，甚麼是A股、H股、法人股、非流通股、大小非，一概免問，一律唔識，有如澳門逸園跑狗，一開閘就追住隻電兔跑跑跑。個個當正總理係電兔，飢餓程度可見一斑，贏咗就個個扮專家。
一句到尾，如果中、港同股的差價就係股價水位的指標，炒股就真係易過炒菜喇！雖然……小妹自覺炒菜真係難過炒股。
總理好英明……用股民錢當然總好過再用中央政府錢，避免可再誤墮四萬億元的陷阱。
缸中所見，中資大行嘅老總，因為總理一句話，即時急call要開會，商討如何迎接所謂「互聯互通」，如何開戶，有冇孖展，就算十萬個未知，最緊要寸、最緊要交足戲。
香港地嘅股場，可以賭「即日鮮」、「白頭片」；而內地風險監控系統雖為T+0，孖展融資卻只惠及少數，舊香港人對A股根本一無所知，連經紀都「懵盛盛」，求求其其以為迎接內地客，經紀如何防止被內地客過兩戙。
最擔心嘅當然係好似搭「日本JR」上錯卡，原本應該搭前面去成田機場的首四卡，卻上錯了後面的去和歌山的另外四卡，甫駛至分岔路即分道揚鑣仍「懵閉閉」。
究竟是香港股民頭腦簡單，抑或是大家聯想大太豐富，你話呢？
胡孟青
獨立股評人
上一則: 異動空間：AH穩膽炒一拖 - 魏力
下一則: 投資學堂：內銀派息守舊 - 譚紹興
青心直說 - 胡孟青 舊文
