總理風頭勁
2014年04月11日
呢個世界講出位，唔單止平民百姓如是，高高在上的總理李克強，都一樣玩吓爆料畀驚喜，佢出席博鰲論壇時突然力挺港滬股市互聯互通，搞到港交所(388) 急急停牌，兩地股市聞訊就抽咗上去。
突送大禮玩驚喜
互聯互通咁大劑嘢，無理由事前無通吓聲氣，股民如果睇咗聲明，放咗或者無買港交所，難免有啲不滿，陸羽仁雖然覺得佢哋咁講值得商榷，但都有小小同情班管理層，因為互聯互通係佢哋一直爭取緊的政策，得唔得要睇北京意旨，就算佢哋聞到味有好消息，又敢唔敢爆響口先？中國官場興講見光死，內地媒體忽然間披露消息，點知係唔係有人想「搞喎」，咁你叫佢點敢認先？點諗到領導人開口，話聯網有眉目呢。
中環茶友聽完，就話李克強做咗總理咁耐，坦白講畀人印象唔係咁深，唔知係咪咁樣，今次佢出席博鰲論壇，專登精心炮製一齣好戲，失驚無神整個神秘禮物畀股民，呢一招真係大出風頭啦！
昨日個市本來受內地公佈進出口數據遜預期的消息拖累，一度跌逾百點，之後受互聯互通的消息刺激愈升愈多。焦點所在的港交所中途急急停牌，停牌前跌1%，報130.9元。恒指全日升343點，收報23186點。國指則升40點，報10421點。主板成交勁爆上1069億，為去年11月18日後最大單日成交。由於炒作互聯互通有助AH股股價拉近差距，相關股份瘋炒。升幅榜頭四位皆為AH折讓股，其中浙江世寶(1057) 飆升65%，緊隨其後有洛陽玻璃(1108) 及東北電氣(042) 漲約四成。
有人歡喜有人愁，個別H股高於A股的股份，H股見沽壓，平保(2318，滬：601318)H股跌3%，A股升逾7%。海螺(914，滬：600585)H股軟2.5%，A股漲停報19.1元人幣。
除了港股，午間中證監公佈總交換額度為5500億人民幣，都刺激咗內地股市，證券商股狂飆，金融股佔比大的上證指數一度大漲1.95%，高見2146，收市報2134，升29點。滬深股市連漲四日，上證指數升至2月20日以來最高位收市。
兩地股市聯網下，最受惠的股票當然係港交所啦，當總理打完開口牌，港交所就急急停牌。上個星期，陸羽仁已經上調呢隻股份嘅評級由過往「無興趣」，變成「有好感」，主要係覺得互聯互通的消息固然緊要，仲有係內地搞緊深化改革，好多都係國企產權重整同金融改革有關，呢啲政策好多都要通過借路股市進行，港交所作為兩岸三地最有效率的市場，自然會有好處，所以唔理短期內有無互聯互通，港交所都變咗一隻「有古仔」可以引起憧憬的股票。不過，?家好消息曝光，咁就不宜未睇位就叫人高追啦，所以如果大家仲有興趣炒吓好消息入市，不如諗吓隻安碩A50(2823) 。
安碩A50勝在唔傷身
呢隻股我過去不時叫人低就買吓，昨日佢一口氣升咗4%，不過，內地A股係好消息刺激下，出現咗四連升，但家仲算係落後，買安碩A50未必會升得多過人，如果想賺盡就唔好買佢，揀佢只係勝在下跌有個譜，就算買唔中都唔會傷身，最啱想買吓又唔想搏命的投資者。
陸羽仁
金融High Tea 舊文
