魚樂無窮：券商併購潮吼實結好 - 唐牛
■筆者今日推介嘅結好控股升呢在望；圖為結好主席洪漢文。 資料圖片
滬港通出台，有指本地中資券商不滿被搶飯碗，密謀反對。中港股市融合乃大勢所趨，資金互通令個餅越做越大，市場氣氛亦會越來越旺，其實利多於弊。以成熟程度計，港股市場乃環球數一數二，內地券商一早吼實呢塊肥肉，但始終人生路不熟，要南下搵食，有本地券商做盲公竹，效果肯定更勝一籌，可以預期，新一輪收購潮如箭在弦，今日推介嘅結好控股(064)，升呢在望。
有齊三大賣點
點解要揀結好？三大原因逐個數！第一，瓣數夠多。1988年成立嘅結好，現時有齊證券、期貨、融資、資產管理業務，可以一次過滿足曬內地同業幾個願望，抵買！
第二，增長強勁。公司中期持續經營業務溢利，按年勁升75%，其中經紀傭金及放債分別上升47%及30%，投資部份亦扭虧為盈，靚爆！
第三，市值夠細。結好最新市值僅17億銀，本港上市內地三大券商平均市值為200億銀，結好連十分之一都唔到，但有齊上述賣點，性價比極高！
唔好忘記，結好早前向銀娛(027)出售澳門金都酒店及賭場業務，錄得5.3億銀龐大收益，最新現金水平高達13億銀，相當於市值76%，嚟緊全年業績盈喜冇走雞之餘，更有權大派特別息。交易亦令公司價值完美釋放，現價每股NAV高達1.15元，用上周五收市價0.37元計，PB只得0.32倍，同業平均價trade緊溢價，結好平靚正，現價上車點計都值博。
唐牛
上一則: Follow Me：鄭煤機炒折讓睇6.1元 - 高彰坡
下一則: 股場放大鏡：江南集團發輪博大炒 - 歐陽風
魚樂無窮 - 唐牛 舊文
