中環在線：三財團申建飛行中心冇下文機管局錫住港航？ - 李華華
■只有港航的建議書呈上機管局董事會旗下執行委員會。
香港航空喺香港上市嘅大計未有進展，但係佢有意喺機場附近興建飛行訓練中心，就可能引起機場管理局內部些少震盪。
據了解，過去兩年，曾經有三間公司或財團向機管局遞交有關投資興建飛行訓練中心嘅報告書，但係全部都被束之高閣，只係得港航嘅建議有機會呈上董事會旗下執行委員會，而港航嘅建議仲最快喺今日開會討論。
航空業內人士透露，最早喺一年半之前，股神畢菲特旗下巴郡全資擁有嘅FlightSafety Academy，向機管局遞交建議書，提議在機場附近興建飛行訓練中心，但係局方冇人跟進。之後，嘉道理集團旗下小型飛機公司MetroJet提出申請，大約6個月前，又有一個澳洲財團提交建議書，不過全部被放埋一邊。
執行委員今日討論批地
據了解，呢三份建議書詳述投資額、整體規劃等，並非粗疏之作，業內人士就係唔明白，點解有人有心投資，見到香港有市場，機管局反而放埋一邊唔理，又唔將項目公開招標，只係將港航嘅建議提交董事會討論。
機管局董事會旗下執行委員會今日開會，有機會討論批地興建飛行訓練中心一事，不過呢個執行委員會相當「小圈子」，董事會17人當中，只得5人參與其中，包括主席張建東、行政總裁許漢忠、董事羅康瑞、鄭維新、運房局局長張炳良。
業內人士認為，機管局如果將項目就咁批畀港航，點都要公開解釋清楚。
李華華
mailto:LiWaWa@AppleDaily.com
上一則: 樂香園：欷歔嘅豬肉佬 - 密西比
下一則: 中環在線：愛駒跑出張華峰冇緣拉頭馬 - 李華華
中環在線 - 李華華 舊文
