中環在線：指賭錢家破人亡捐賭業收益純官忽然嫌錢腥？ - 李華華
■一向有投資賭業嘅鄭家，話事人純官突然頓悟，話「唔係咁道德」，所以捐曬啲錢做善事。黃賢創攝
周大福(1929)主席鄭家純(純官)唔知幾時頓悟了，佢爸爸鄭裕彤早年與賭王何鴻燊喺澳門開賭，投資澳娛，純官𠵱家都係澳娛旗下澳博(880)非執董，佢噚日竟然話「賭錢都可能會令到人哋家破人亡，唔係咁道德」，於是早前決定將所有從賭業搵到嘅錢，回本後，全部放入企業慈善基金。
純官噚日跟傳媒食晏時透露，周大福企業(唔係上市賣金嗰間，係家族投資旗艦)董事會已經通過，決定以後將集團所有從賭業搵到嘅錢，包括澳娛收到嘅股息、菲律賓賭場嘅收益等等，回本後，全部放入企業慈善基金，成為基金未來嘅穩定收入，自己就「一毫子都唔會賺」。
純官話，雖然開賭「絕對係正途」，但佢覺得「賭錢都可能會令到人哋家破人亡，唔係咁道德」，所以決定捐曬出來做善事，「咁我就心安理得。」
■純官指賭錢家破人亡，會捐出賭業收益。
「你唔做，人哋都會做」
咁點解唔索性唔做呢？純官就解釋：「你唔做，人哋都會做喇。咁人哋賺咗就收埋啲錢，我係拎出來做慈善。」
佢冇透露基金𠵱家有幾多錢，只係形容唔算好大，希望未來越滾越多，捐助項目包括教育、扶貧、醫療。
大家都知鄭裕彤跟賭王份屬好友，早年入股澳娛。澳博招股書披露，鄭裕彤家族持有澳娛大約9.6%。鄭家亦繼續拓展賭業版圖，例如今年初透過國際娛樂(1009)收購澳門商人周焯華持有嘅疊碼仔業務，最近又組財團競投澳洲昆士蘭省賭牌等。純官覺得賭業可能令人家破人亡，搵完錢再拎去做慈善，究竟係乜邏輯？
李華華
mailto:LiWaWa@AppleDaily.com
上一則: 樂香園：滬港通真係咁著數？ - 海迪
下一則: 中環在線：自稱唔識睇科技「我比較蠢」 - 李華華
中環在線 - 李華華 舊文
